Кумановскиот суд ја уважи жалбата на обвинителството за одлагање на почеток на издржување казна затвор за осудениот Бобан Илиќ, кој во 2016 година го прегази четиригодишниот Алмир Алиу од Куманово.

„Основниот суд Куманово ја уважи жалбата на кумановското обвинителство изјавена против решение на судија за извршување кривични санкции донесено на 19 февруари 2021 година, со кое на осудениот Б.И. од Куманово му се одобри барањето за одлагање на почетокот за извршување на казната затвор.

Имено, обвинителството незадоволно од донесеното решение, поднесе жалба на 22 јануари 2021 година, со која побара кривичниот совет при Основниот суд Куманово да го преиначи решението во насока осудениот веднаш да ја извршува досудената казна. Казната затвор во траење од 4 години, по поднесено обвинение на кумановското обвинителство и судска постапка, на осудениот му беше изречена од Апелациониот суд, а за сторено кривично дело тешко дело против безбедноста на луѓето и имотот во сообраќајот од член 300 став 2 во врска со член 297 став 1 од Кривичниот законик. Осудениот го стори кривичното дело на 25 јуни 2016 кога со автомобил му нанесе тешки телесни повреди со смртна последица на четиригодишниот Алмир Алиу од Куманово.

Одлучувајќи по поднесената жалба од обвинителството, Основниот суд Куманово донесе решение со кое го преиначи решението на судијата за извршување  кривични санкции и осудениот го задолжи веднаш по приемот на одлуката да се јави во казнено-поправна установа за да почне со издржување на затворската казна“, соопшти обвинителството.​

Tетовската полиција поднесе кривична пријава против 57-годишниот Б.И. (57) од овој град поради сомнение за сторени кривични дела узурпација на недвижности и бесправно градење.

Како што информираат од МВР, тетовецот во својство на инвеститор, во текот на 2020 година, на катастарска парцела во државна сопственост, без одобрение за градба од надлежен орган, во Тетово изградил објект со што узурпирал државно земјиште на површина од 117 квадратни метри.

Кавадаречката полиција поднесе кривична пријава против И.Д.(38) поради сомнение за сторено кривично дело неовластено производство и пуштање во промет на наркотични дроги.

Како што информираат од МВР, на 29 мај минатата година полициски службеници извршиле претрес во дом и помошни простории кај И.Д., во два објекта на правно лице, кои ги користи, како и викендичка покрај Тиквешко Езеро, при што пронашле и одзеле кокаин, пари и воздушна пушка „камо“ со калибар 4.5 мм, за која не приложил дозвола.