(Фото: Илустрација)

Седумдесет и двегодишна жена почина по удар од автомобил во Скопје.

Како што соопшти полицијата вчера во жената со иницијали Т.С. удрило непознато патничко возило, управувано од непознат возач.

Несреќата се случила на крстосницата од улиците „Нов живот“ и „Клисурска“, а жената по ударот била пренесена во Градската општа болница „8-ми Септември“, каде по неколку часа била констатирана смрт.

Увид бил извршен, а по наредба на Јавен обвинител телото на починатата било дадено во институтот за судска медицина на обдукција. МВР јави дека преземаат мерки за пронаоѓање на возачот и возилото и за целосно расчистување на случајот.

Утрово по полноќ, на крстосницата од регионалниот пат Куманово-Свети Николе се преврте патничко возило управувано од 26-годишно лице од Скопје.

Како што соопшти полицијата, возилото излетало од патот и се превртело на покривот во Кнежевска река.

„Со тешки телесни повреди е здобиле сопатниците П.Ј.(25) од Скопје, А.М.(21) од Куманово и Х.И.(20) од Скопје. Со возила на Итна медицинска помош тие биле пренесени во болницата во Штип, по што П.Ј. бил пренесен во Градската општа болница „8-ми Септември“ во Скопје, а останатите биле задржани на понатамошно лекување“, соопшти МВР.

Увид на местото извршила екипа од Полициската станица Свети Николе.

МВР соопшти дека утрово во 9.50 часот било пријавено дека има починато женско лице во нива што се наоѓа во непосредна близина на последната автобуска постојка во село Волково.

На местото излегле полициски службеници и било констатирано дека се работи за лицето М.Ѓ. (29) од Скопје, а смрт без видливи траги на насилство констатирал лекар од Итната медицинска помош. По наредба на јавен обвинител, телото на починатата било пратено на обдукција.