Малолетник од Волково бил повреден откако едно лице фрлило со тврд предмет во стаклото од автобус на раскрсницата од ул. Лука Геров  со ул.  Тиранска  во Скопје, соопшти полицијата.

Имено, вчера во 15:51 часот во Полициска станица Ѓорче Петров, А.П. пријавил дека додека управувал автобус со скопски регистарски ознаки, на раскрсница од ул. Лука Геров  со ул.  Тиранска  во Скопје, едно лице, фрлајќи со тврд предмет, оштетило стакло од автобусот и повредило малолетен патник од с.Волково, Скопско, на кого му била укажана лекарска помош.

За случајот е известен Јавен обвинител, а увид на местото извршила екипа од СВР Скопје. Се преземаат мерки за расчистување на случајот.

Јавен обвинител од Основното јавно обвинителство Скопје донел наредба за спроведување истражна постапка против две лица за кои постоело основано сомнение дека како соизвршители сториле кривично дело разбојништво според член 237 став 4 во врска со став 1 и во врска со член 22 од Кривичниот законик.

Двајцата осомничени, на 4 август, влегле во продажен салон за бела техника и апарати на улицата Ѓорче Петров и на тројцата вработени им се заканиле со автоматска пушка и пиштол.

Од продажниот салон противправно одзеле 96.000 денари и 20 мобилни телефони.

По извршеното разбојништво, во автомобил со регистарски таблички од друго возило, осомничените го напуштиле местото и се упатиле кон Сарај. Притоа биле забележани од полициски службеници кои неколкупати се обиделе да го сопрат возилото, но осомничените ја зголемувале брзината. Во близина на мостот Сарај, на излез од Скопје, биле запрени и лишени од слобода.

За едниот осомничен јавниот обвинител до судијата на претходна постапка од Основниот кривичен суд Скопје доставил предлог за определување мерка притвор, додека другиот осомничен се наоѓа на издржување казна затвор за друго кривично дело во КПУ Прилеп, информираа надлежните.

Основното јавно обвинителство Куманово, постапувајќи по поднесена кривична пријава, донело наредба за спроведување истражна постапка против турски државјанин со живеалиште во Скопје, кој е осомничен за кривично дело криумчарење од член 278 став 3 во врска со став 1 од Кривичниот законик, соопштија надлежните.

Осомничениот 55-годишник бил корисник на старосна пензија во Република Турција, додека во земјава бил ангажиран со договор на дело како возач на автобус во превозник од Скопје.

На 7 август осомничениот управувал со автобус на редовна линија Пореч, Р Хрватска – Гостивар РС Македонија.

На граничниот премин Табановце, преку царинска линија, при влез во земјава, се обидел да ја избегне царинската контрола и пренел непријавена стока од големи размери – златен накит, часовници и златни плочки во вкупна вредност од 36.305.644,81 денари.

Пратката со златни предмети претходно ја зел од хрватски државјанин и ја скрил во делот каде што се наоѓа вентилацијата на автобусот.

При контрола од овластени царински службеници таму биле пронајдени 18 пакувања во кои имало 97 златни прстени, 39 златни ѓердани, 133 златни белезици, 4 парчиња белезици со полускапоцени камења, 5 парчиња сини златни белезици, 8 парчиња жолти златни белезици, 5 парчиња гумени белезици со златни плочки, 5 парчиња часовници златни без механизми и нивни делови, 33 парчиња златни приврзоци, 91 парчиња златни обетки, 23 парчиња златни монети, 48 парчиња златен кршен накит, 73 парчиња златни плочки во правоаголна и друга форма и 3 пакети злато во гранули.

Златните предмети биле со вкупна тежина од 13,3 килограми.

Основно јавно обвинителство Куманово до судијата на претходна постапка на Основниот суд во Куманово поднело предлог за определување на мерката притвор против осомничениот, бидејќи, како што велат од таму, постои основан страв дека може да се даде во бегство, но и да го повтори кривичното дело доколку се брани од слобода.​