ВМРО-ДПМНЕ избра борба против неодоговорната власт, рече вечерва генералниот секретар на опозициската партија, Игор Јанушев, на прес-конференција.

Тој нагласи дека структури на власт и нивни одработувачи вршат притисок врз пратеници.

„Собранието стана пазар и арена за уцени. Се апси поради полициски прогон и тргуваат со слободата, ветуваат награди за послушните, заплашување врз семејства на пратеници за да гласаат. Парламентот е опкружен со ликови со бричени глави, кои му се познати на подземјето. На еден пратеник му понудија милион евра за да гласа, на друг 250 илјади евра, а на трет 2 милиона евра. Сето ова е одбиено“, истакна Јанушев.

Тој до пермиерот Заев упати прашање дали има алал во ваквите постапки.

„Свесен ли сте во каков амбис ја водите државата? Ова е преседан, не е ова за европска Македонија, ова е диктатура и насилство. Да им дадам признание на пратениците од ВМРО-ДПМНЕ кои не потклекнаа“, истакна генералниот секретар на партијата.

Тој сепак не сакаше да открие на кои пратеници им се нуделе пари и побара Обвинителството да истражи.

Собранието на РМ вечерва сепак ќе ја одржи седницата за уставните измени, дознава „Макфакс“ од неофицијални извори.

Според овие избори, претседателот на Собранието, Талат Џафери, седницата ја закажал за 21 часот.

Претходно, од опозициската партија ВМРО-ДПМНЕ соопштија дека не добиле никакво известување од собранискиот спикер и дека денешната седница ја сметаат завршена бидејќи, како што велат оттаму, според Деловникот, седница трае од 11 до 18 часот, освен ако со писмо претседателот на Собранието не одлучи поинаку.

Пратениците од редовите на ВМРО-ДПМНЕ пред почетокот на продолжението на седницата за уставните измени на прес-конференција побараа од претседателот на Собранието, Талат Џафери, веднаш да почне гласањето за измените.

„Поминаа 19 дена од неуспешниот референдум на кој народот се изјасни дека нема одлука која дава мандат за уставни измени. Власта го одолговлекува гласањето затоа што се свесни дека за пратениците е поважна волјата на народот од притисците. Бараме Талат Џафери да ја стави точката на гласање и власта да види дека нема двотретинско мнозинство за уставните измени“, порача пратеникот Антонијо Милошоски.

Тој додаде дека ќе гласаат согласно волјата на народот, која, како што рече, е посилна од притисокот врз неколку пратеници.

На прес-конференцијата не беа присутни сите пратеници од ВМРО-ДПМНЕ и коалицијата.