Американскиот претседател Доналд Трамп во ексклузивно интервју за Ен-би-си изјави дека сака целосна промена на раководството во Иран и дека има на ум неколку луѓе за кои верува дека би биле соодветни за нов лидер. Трамп, исто така, откри дека се преземаат чекори за да се осигури дека неговите кандидати ќе ја преживеат војната. „Сакаме да влеземе и да исчистиме сè“, рече Трамп во телефонски разговор, објави Ен-би-си Њуз.

Во друго интервју за Аксиос, Трамп рече дека мора да биде вклучен во изборот на следниот лидер на Иран.

„Имаме луѓе кои би завршиле добра работа“

„Не ни треба некој што ќе ја врши обновата во следните 10 години“, рече претседателот.

„Сакаме тие да добијат добар лидер. Имаме неколку луѓе за кои мислам дека би биле одлични за работата“, додаде тој, одбивајќи да открие кои се тие.

На прашањето дали презема чекори за да ги заштити овие лица, Трамп рече: „Да, се грижиме за нивната безбедност“.

Коментарите следат по изјавите што ги даде минатата сабота. Кога во тоа време го прашаа кој ќе го води Иран, тој одговори: „Не знам, но во еден момент ќе ме повикаат да ме прашаат кого би сакал“, додавајќи дека бил само малку саркастичен кога го кажал тоа.

Реакција на иранските закани
Трамп се осврна и на изјавата на иранскиот министер за надворешни работи, Абас Аракчи, кој за Ен-би-си Њуз изјави дека неговата земја е подготвена за копнена инвазија од страна на американските и израелските сили.

Трамп го нарече тоа бесмислен коментар и посочи дека во моментов не размислува за инвазија.

„Тоа е губење време. Тие изгубија сè. Ја изгубија морнарицата, изгубија сè што може да се изгуби“, рече Трамп, додавајќи дека темпото и интензитетот на нападите ќе продолжат.

Иран се соочува со вакуум во власта откако врховниот лидер Али Хамнеи почина минатиот викенд. Постојат шпекулации дека неговиот син Моџтаба Хамнеи би можел да го наследи. Аналитичарите велат дека Исламската револуционерна гарда, доминантната воена, политичка и економска сила во земјата, е исто така подготвена да го прошири своето влијание ако го преживее сегашниот конфликт.

Речиси 200 деца се убиени низ Блискиот Исток од саботата, од првиот американско-израелски напад врз Иран, соопшти УНИЦЕФ.

Најмалку 181 дете се убиени во Иран, седум во Либан, три во Израел и едно во Кувајт, според неговите податоци.

„Децата не започнуваат војни, но плаќаат неприфатливо висока цена за нив. Воената ескалација низ Блискиот Исток веќе има разорно влијание врз децата“, соопшти УНИЦЕФ.

Напад врз училиште во Иран
За време на првиот ден од нападите на САД и Израел врз Иран, беше погодено училиште за девојчиња во Минаб во јужен Иран, при што загинаа најмалку 175 ученички, според Иранската револуционерна гарда.

Нападот се случи во саботата откако САД и Израел најавија заеднички напади врз Иран.

Иранскиот министер за надворешни работи, Абас Аракчи, ги обвини САД и Израел за убиството на ученичките.

„Ова се гробови што се копаат за повеќе од 160 невини девојчиња убиени во американско-израелското бомбардирање на основно училиште. Нивните тела се распарчени“, напиша Аракчи на социјалната мрежа Икс, заедно со слика од свежо ископани гробови.

Израелската војска тврди дека не е запознаена со никакви израелски или американски напади во областа, додека САД најавија истрага, тврдејќи дека тие се насочени исклучиво кон воени цели.

Главниот град на Иран, Техеран, утрово беше под силни воздушни напади, а експлозии одекнуваа низ целиот град, објавија државните медиуми. Авенијата Јомхури, популарна трговска-зона и една од најпрометните улици во центарот на Техеран, наводно беше цел на нападот.

Иранскиот државен радиодифузер IRIB објави за последиците. „Улицата Јомхури, автобуската станица Јами и куќа во станбена зона беа целосно уништени. Улиците во централниот и источниот дел на Техеран сега се пусти“, соопшти IRIB.

Израелската војска денес потврди дека започнала „масовен бран напади“ врз клучната инфраструктура на режимот во Техеран.

Репортерите на CNN во близина на Техеран ја слушнаа постојаната бучава од авионите, а иранските медиуми, исто така, објавија гласни експлозии и звуци на борбени авиони што летаат над главниот град.

Во меѓувреме, портпаролот на иранската воена команда, Хатам Ал Анибја, изјави во петокот дека „нападите на нашата земја врз непријателските позиции во наредните денови ќе бидат уште пожестоки и посеопфатни“.