Во затворот „Кшање“ во Куманово ноќеска бил пронајден мртов 58-годишен затвореник од с.Старо Нагоричане.

„ На 19.06.2021 во 02.45 часот во Полициска Станица Крива Паланка е пријавено дека во Затвор „Кшање“, во отвореното одделение, бил пронајден починат затвореникот М.Ј.(58) од с.Старо Нагоричане, кумановско“ соопшти МВР.

По насока на Јавен обвинител телото на починатиот е дадено на обдукција.

Во последните 24 часа во Македонија се потврдени четири нови случаи на коронавирус, едно лице почина, а 68 оздравеа, соопшти Министерството за здравство.

Направени се 3.074 тестирања, а регистрирани се по еден нов случај од Скопје, Прилеп, Тетово и Кочани.

Регистрирани се 68 оздравени пациенти од: Скопје – 32, Куманово и Кичево – по 6, Тетово, Охрид и Струмица – по 4, Струга и Делчево – по 3, Кочани и Неготино – по 2, Прилеп и Македонска Каменица – по 1.

Пријавено е едно починато лице од Скопје (80г), починато во болнички услови.

Досега во земјата се направени вкупно 851.408 тестирања на Ковид-19.

Вкупната бројка на КОВИД-дијагностицирани лица во нашата земја од почетокот на епидемијата изнесува 155.616, бројката на оздравени пациенти е 149.790, на починати е 5.475, а бројот на активни случаи изнесува 351.

Не е вистина дека пациенти не се оперираат и системот на скопските клиники е во колапс, тврди министерот за здравство, Венко Филипче, по поплаки од пациенти дека не се закажуваат ургентни случаи за операција бидејќи медицинскиот кадар е на одмор.

Според Филипче, целокупниот програм се одвива нормално. Доктори и сестри користат одмори, бидејќи не се знае каков бран на вирусот може да има во Македонија на есен.

„Во тек сум, тоа не е вистина. Целокупниот програм се одвива нормално. Итните случаи, заедно со малигните, не запреа ниту во вонредната ситуација лани. Точно е дека добар дел од лекарите ги користат старите заостанати годишни одмори. Лекарите и сестрите не беа повеќе од година дена на годишен одмор. Заеднички став и порака е да се користат старите одмори сега до крајот на јуни и во летните месеци. Организацијата е направена за воопшто да не трпи редовното изведување на интервенциите. Фокус ставаме здравствените работници да се одморат, бидејќи не знаеме што не чека на есен. Можно е да имаме нов бран, нов силен притисок, тие луѓе заслужуваат одмор. Но тоа не значи дека програмот за операции – трпи“, рече Филипче.

Министерот посочи дека новата мутација може да биде позаразна од сегашната. Но, смета дека сите вакцини штитат од смртен исход или тешка форма на болеста.

„Нова форма на мутација која може да биде позаразна од сегашните активни е присутна насекаде. Но, што е многу важно, дека буквално сите вакцини штитат од тешка форма на болеста или смртен исход, дури и од таква мутирана форма на вирусот. Епидемиолошките анкети покажаа дека нема потреба од дополнителни мерки“, додаде Филипче.