Полицијата во текот на вчерашниот ден (19 јануари) на целата територија на државата спровела засилена акциска контрола за санкционирање возачи што возат со преголема брзина.

Од МВР нагласуваат дека ваквиот прекршок е најчеста причина за сообраќајни незгоди со тешки последици.

Вкупно во акцијата биле санкционирани 566 возачи што возеле со брзина поголема од дозволената.

Од нив, 279 надвор од населено место, а 287 во населено место. 18 возачи возеле со брзина од 70 километри на час над дозволената, а 65 возачи возеле со брзина од 50 километри на час над дозволената.

Од МВР додаваат дека засилените контроли во сообраќајот продолжуваат и во наредните денови.

Во текот на изминатото деноноќие во однос на мерката за носење заштитна маска како превенција од коронавирусот регистрирани се 368 прекршоци, информираат од МВР.

Од Министерството воедно апелираат граѓаните да ги почитуваат мерките и протоколите донесени од Владата со цел справување со Ковид-19.

Тетовската полиција го расчисти случајот со видео-клипот кој неодамна преку социјалната мрежа „Тик-ток“ се појави во јавноста, а се однесува на незаконско поминување на наплатна рампа, информираат од МВР.

Како што додаваат од таму, на него се гледа како маж покажува некаква легитимација на наплатна станица и без да плати надоместок, поминува со возило „мерцедес“, со гостиварска регистарација.

Вадење легитимација и лабаво по патарина..
ШЕРИФСКИ!👏
🆘️🚨🆘️🚨🆘️🚨 pic.twitter.com/cjdU97UrT8

— Две Ѕвезди (@dvezvezdi1) January 15, 2021

Станува збор за М.З. (32) од тетовско Желино и со него на 18. јануари бил извршен службен разговор во полициска станица, а по целосно документирање на случајот ќе следи и соодветен поднесок.

Воедно од МВР појаснуваат дека М.З. не е вработен во министерството, како што претходно беше објавено во дел од медиумите.