Јавен обвинител од Основното јавно обвинителство Скопје поднесе Обвинителен предлог против државјанин на Република Турција за кривично дело – Фалсификување исправа.

Обвинетиот, на 25 август, при поднесување на барањето за продолжување на дозволата за привремен престој во земјава по основ вработување, употребил како вистинска преправена јавна исправа – турски пасош. Во патната исправа била извршена преправка така што биле заменети оригиналните страници со податоци и фотографија на обвинетиот.

Речиси секојдневно до полицијата стигнуваат пријави од измамени граѓани, а во врска со наводни сообраќајни несреќи и плаќање големи суми.

76-годишен жител на Охрид е последната жртва. Тој бил измамен од едно лице за сума од 650 евра и 40.000 денари. Според пријавеното, околу 15 часот измамникот му се јавил на неговиот мобилен телефон и му соопштил дека бил очевидец на сообраќајна незгода со смртни последици, предизвикана од неговата ќерка во една соседна земја. Исто така, лицето му побарало 25.000 евра за да помогне ќерка му да ја избегне затворската казна.

Како што е пријавено, лицето се согласило и за помала сума и набргу пријавителот му дал 650 евра и 40.000 денари.

СВР Охрид апелира до граѓаните, особено до повозрасните, да не наседнуваат на вакви и слични информации добиени од непознати лица и секој таков случај да го пријават на телефонскиот број 192 или во најблиската полициската станица.

Вчера, на регионалниот пат Мушев Гроб – Кавадарци, возило, управувано од А. Р. (20) од Неготино, излетало од коловозот.

Во незгодата 17-годишна сопатничка од Кавадарци добила тешки телесни повреди, а возачот добил телесни повреди констатирани во Општата болница во Кавадарци.

Од МВР велат дека извршен бил увид на местото на настанот од екипа од Полициската станица Кавадарци.