Кривичниот совет при Основниот кривичен суд Скопје ја уважи жалбата на осомничениот С.Б. и ја прифати понудената гаранција, со што му е укината мерката притвор што претходно му беше определена, се истакнува во официјалното соопштение.

„Кривичниот совет при Основниот кривичен суд Скопје, постапувајќи по жалба со предлог гаранција на осомничениот С.Б., изјавена против решение на судија на претходна постапка од 04.06.2026 година со кое, по предлог на надлежниот јавен обвинител, му беше определена мерка притвор во траење од 30 дена, донесе решение со кое ЈА УВАЖИ жалбата и ја прифати понудената гаранција на осомничениот“.

Определената гаранција, како што се наведува во соопштеното, се состои од готови средства во износ од 55.000 евра, во денарска противвредност во корист на РС Македонија, а кој износ се депонира како гаранција за обезбедување на присуството на осомничениот во понатамошниот тек на постапката.

„Дополнително спрема обвинетиот се определуваат и мерки на претпазливост согласно член 146 ст.1 т.3 од ЗКП односно привремено одземање на патната исправа и забрана за преминување на државната граница.

Доколку осомничениот не се придржува на определената мерка на претпазливост, судот може да определи други построги мерки за обезбедување присуство“.

На вонредна прес-конференција поранешниот градоначалник на Општина Карпош, Стевчо Јакимовски, изјави дека изречената пресуда за една година затворска казна ја смета за политички мотивирана.

Тој рече дека е осуден не затоа што сторил кривично дело или ја злоупотребил службената положба, туку поради, како што рече, политички причини.

„Осуден сум политички не затоа што сум направил криивчно дело или сум ја злоупотребил својата положба и овластување, осуден сум затоа што власта, овој диктаторски режим, си постави во Карпош тотално неспособен градоначалник кој четири, пет месеци буквално блееше низ прозорот и потоа земајќи боледување кое е лажно и оттогаш наваму му се губи трага. Тоа е причината. А поводот кој е искористен, се бараките за кои недостасува само едно ливче, а тоа е дека имаме дозвола за поставување на времен објект.
Цело време ние докажуваме дека ова е времен објект“.

Според него, станува збор за конструкции изработени од гипс-картон и челична конструкција, кои можат да бидат демонтирани и преместени на друга локација, поради што не можат да се третираат како трајни градби.

Очигледно е, додава Јакимовски, дека во оваа ситуација не е важно дали е виновен туку да биде спречен да се кандидира за градоначалник на Општина Карпош.

„Повеќе од очигледно е дека лицето кое беше поставено за градоначалник на општината го напушти своето работно место и сега нормално е дека власта бара чаре како да се справи со евентуалниот губиток на општината, затоа што нивниот рејтинг и бројот на гласови се буквално преполовени. И тоа е единствената причина зошто ја носат оваа пресуда“, истакна Јакимовски.

Апелациониот суд ја потврди првостепената пресуда против поранешниот градоначалник на Општина Карпош, Стевчо Јакимовски, со која му е изречена казна затвор од една година за кривичното дело „бесправно градење“.

Во изречената казна ќе му биде пресметан и периодот поминат во куќен притвор, од март до август.

Во однос на обвинението за „Злоупотреба на службената положба и овластување“, жалбата на Јакимовски е прифатена и предметот е вратен на повторно судење. Судот посочи дека делото се однесува на периодот од 2011 до 2017 година и дека постои можност случајот да застари во текот на 2027 година.