Полицијата приведе 39-годишен дилер на  хероин во Кичево.

Според информациите на МВР, денеска во 15:30 часот на ул. Нико Пушоски во Кичево полициски службеници го привеле З.Б.(39) од Кичево, затоа што при извршен преглед кај него биле пронајдени  44 пакувања хероин.

Лицето е приведено во полициска станица. По документирање на случајот, против него ќе биде поднесен соодветен поднесок.

Парични казни за две лица од Скопје кои го прекршиле полицискиот час, информираат надлежните.

Скопското јавно обвинителство поднесе предлог за издавање казнен налог против две лица за кривично дело- непостапување според здравствените прописи за време на епидемија казниво по Кривичниот законик.

Обвинетите на 6 април, за време на важечки полициски час, без да поседуваат дозвола се движеле пеш по улицата „Беласица“ во Скопје. Со тоа тие ги прекршиле прописите со кои се определуваат мерки за заштита од заразната болест Ковид-19.

Јавниот обвинител на Основниот кривичен суд Скопје му предложи за двете лица да определи парични казни од по 100 дневни глоби со поединечна вредност на дневната глоба од 20 евра во денарска противвредност.​

Битолското Основно јавно обвинителство донесе наредба за истрага против две лица од Битола и Прилеп за кривично дело разбојничка кражба.

Истрагата е поведена под сомнение дека двајцата, заедно со уште едно непознато лице, кое според првичните информации од истрагата чувало стража, на 14 април биле затечени при кражба во стан на улицата Климент Охридски.

Ги затекнале двајца соседи, кои се обиделе да ги спречат во намерата и да ја известат полицијата, но осомничените употребилe сила, се нафрлиле врз соседите, ги собориле на скалите, при што на едниот сосед му нанеле тешка повреда.

Едниот осомничен потоа употребил и нож замавнувајќи кон станарите по што се дал во бегство и сѐ уште не е достапен на органите на прогонот, а другиот е уаспен.

Основниот суд Битола определи мерка притвор во траење до 30 дена кон двајцата осомничени. За оној што е во бегство притворот ќе почне да се применува кога ќе биде уапсен.​​