Дваесет и едногодишен жител на Неготино снимал и фотографирал на Криволак, а потоа материјалот го објавувал на социјални мрежи.

Според информациите на МВР, вчера во 13:40 часот, Д.К. (21) од Неготино е службено испитан поради сомнение за сторено кривично дело „неовластено влегување во воени објекти и изработка на скици или цртежи на воени објекти и борбена опрема“, казниво по член 350 од Кривичниот законик.

Тој е осомничен дека на Криволак ги снимал и фотографирал возилата на воениот полигон во конвојот на Армијата и тоа го објавил јавно на социјална мрежа, со што ја нарушил безбедноста и тајноста на активностите што ги спроведува армијата.

Јавниот обвинител е известен за инцидентот и по документирањето на инцидентот ќе биде поднесен соодветен извештај, велат од МВР.

Една жена е тешко повредена, а тројца сопатници се здобиле со телесни повреди во сообраќајна несреќа што се случила вчера вечер во Скопје.

Несреќата била пријавена околу 18:00 часот на улицата „Шабан Рамети“, каде Д.Д. (22) од Германија, управувајќи патничко возило „шкода“ со скопски регистарски ознаки, изгубил контрола и удрил во бетонска бандера.

Во несреќата со тешки телесни повреди се здобила сопатничката А.Ф. (63), додека со телесни повреди се здобиле Ј.И. (60), Х.С. (56) од село Рашче и А.В. (56) од село Долно Свиларе.

Повредите биле констатирани во Градската општа болница „8 Септември“ во Скопје.

Увид на местото извршила екипа на СВР Скопје.

Мајка на ученик физички нападнала учителка на родителска средба во основното училиште „Браќа Миладиновци“ на подрачјето на Општина Аеродром.

Според информациите на МВР, вчера во 22:10 часот во СВР Скопје, К.К.Л. од Скопје пријави дека околу 17:00 часот во училница во основно училиште на подрачјето на општина Аеродром, додека заедно со нејзина колешка одржувале родителска средба, М.М.Г. од Скопје, инаку мајка на ученик, физички ја нападнала К.К.Л..

Се преземаат мерки за расчистување на случајот.