Три лица се тешко повредени во сообраќајна несреќа што вчера попладне се случила на булеварот Партизански одреди во Скопје помеѓу полициско возило „ауди 4“ и „хјундаи“.

Во незгодата повредени се двајцата возачи – М. М. (30) и Д. С. (46) и совозачот на полициското возило З. Т. (52), сите тројца од Скопје.

Извршен е увид.

Двајца затвореници додека биле во затворот во Штип измамиле друг затвореник од Охрид, со чии податоци подигнале брзи кредити.

СВР Охрид поднесе кривична пријава против П. С. (30) од Штип и П. Т. (41) од Свети Николе поради постоење основи на сомнение за сторено кривично дело измама. Пријавените во текот на ноември и декември 2020 година, додека издржувале казна затвор во Казнено-поправната установа „Затвор – Штип“, оствариле контакт со жител од Охрид и доведувајќи го во заблуда ги обезбедиле неговите лични податоци и документи.

Подоцна, со тие податоци подигнале брзи кредити од неколку финансиски друштва, а примопредавањето на парите го вршеле преку посредник. На овој начин пријавените стекнале противправна имотна корист од 100.000 денари.

Охриѓанец бил измамен на „Фејсбук“ да уплати пари за да добие наследство за што требало да разговара со адвокат од Франција. 53-годишникот, кога сфатил дека е измамен, го пријавил случајот во МВР.

Тој рекол дека на 1 март преку порака што ја добил од друг профил бил известен дека е добитник на наследство поради што треба да стапи во контакт со адвокат од Франција.

Како што е пријавено, притоа добил информација дека како примател на наследството треба да уплати парични средства за да му биде префрлено на неговата трансакциска сметка по што во неколку наврати лично уплатил вкупно 3.730 евра, како и 800 евра што ги уплатил негов пријател.

Се преземаат мерки за расчистување на настанот.