Обвинителството бара притвор за две лица кои извршија рабојништво на бензинска пумпа во селото Велешта. Надлежен јавен обвинител од Основното јавно обвинителство Струга донесе Наредба за спроведување истражна постапка против две лица за сторено кривично дело Разбојништво од член 237 став 4 од Кривичниот законик.

Осомничените, 24-годишен жител на с. Велешта и 27-годишен државјанин на Република Албанија, се гонат за разбојништвото кое на 3 август годинава го извршиле во бензинската пумпа на Макпетрол , лоцирана во с. Велешта, Струшко.

По интензивно преземање дејствија во координација со Министерството за внатрешни работи, двајцата осомничени беа лишени од слобода во текот на вчерашниот ден.Поради постоење на законските основи, надлежниот јавен обвинител до Основниот суд Струга достави предлог за определување на мерката притвор за осомничените лица.

Четиригодишно дете со тешки повреди е пренесено во болница откако во него удрил автомобил.

Според информациите на МВР, несреќата се случила вчера околу 14:40 часот во Кочани на улица „Цар Самоил“ кога Т.Ц.(38) од Кочани со „фиат темпра“ со штипски регистарски ознаки удрил во четиригодишно дете од Македонска Каменица.

Детето се здобило со тешки телесни повреди и по укажаната лекарска помош во Здравствен дом Кочани е препратено во Клинички центар Штип. Извршен е увид на местото на настанот и се работи на утврдување на причините за несреќата.

Вработена во казино во центарот на Скопје му овозможила на друго лице бесплатно да игра рулет со што се стекнале со противправна имотна корист од 1,4 милион денари.

Полицијата поднесе кривична пријава против М.М.(21) од село Волково за сторено кривично дело „затајување“ и против О.А.(24) од село Сарај за сторено кривично дело „поттикнување“.

На 6 септември во казино на булевар Партизански Одреди првопријавената, како вработена во казиното, по претходен договор со второпријавениот, во повеќе наврати на истиот му издала кредити за рулет за кои тој не извршил уплата. Со ова, според информациите на МВР, двајцата се стекнале со противправна имотна корист од 1.486.383 денари.