Десет лица, кои вчера беа повредени во бродската трагедија во Охридското Езеро, синоќа се прегледани на Военомедицинската академија во Софија, соопшти заменик-директорот на болницата Евгени Белоконски

Шестмина од прегледаните ја напуштиле болницата по сопствена желба, откако им биле обработени повредите – претежно модрици и гребнатини. Во моментов во ВМА има четворица од повредените, јави бугарската новинска агенција БТА. Единиот од нив е на хируршкиот оддел со контузии во делот на грбот. На интензивна нега е жена со аспиративна бронхопневмонија, чие лекување најверојатно ќе трае подолго. Таа беше хоспитализирана и во болницата во Охрид и беше во најтешка состојба. Во моментов нејзината состојба е добра.Мајката и сестрата на 22-годишната девојка која загина во несреќата исто така се во болница и се под голем стрес поради загубата. Најверојатно и нивното лекување ќе трае подолго.Четворица од преживеаните денеска ќе се консултираат со специјалисти со цел да го надминат стресот, иформира психијатрот Илија Маринов. Лекарите се надеваат дека во текот на наредната недела сите хоспитализрани ќе бидат пуштени дома. Директорот на ВМА, генерал Стојан Тонев им изразил сочувство на блиските на загинатите во несреќата во Охрид. Тој ја истакнал ангажираноста на државата, добрата координација меѓу институциите на Бугарија и на Македонија, како и експертското ниво што го обезбеди бугарската страна, јави БТА.