Уред на гас и дотраена електрична инсталација во манастриската кујна најверојатно се причините за пожарот во манастирот Свети Јован Бигорски, дознава репортерот на Форум

Според информациите од теренот, во пожарот зафатени биле кујната, машката и женската трпезарија и конаците. Тие се сосема изгорени. Според директорот на Државниот завод за спасување Екрем Зендели, штетата е непроценлива, а од она што веќе било зафатено во манастирот не било да се спаси ништо повеќе.Според очевидци, пламени јазици се кревале во височина до 15 метри. Ламбе Стојкоски од Ростуше вели дека го здогледал пламенот од дома и дека помислил оти планината гори. Колку што можел побрзо стигнал на местото на настанот и се приклучил во гаснењето во пожарот. Вели дека имало многу селани што им помагале на пожарникарите.Според Дирекцијата за заштита и спасување, за пожарот во Свети Јован Бигорски биле известени околу 4.20, по што екипите од Гостивар, Тетово, Дебар, Кичево и Струга веднаш биле активирани. До 5.20 пожарот бил изгаснат. Во пожарот нема повредени. Навреме биле евакуирани сите што престојувале во манастирот, иако во една од собите каде што се наоѓале девет монаси било критично.Според сите сознанија, работниците во манастирот, монасите и свештениците навреме биле излезени и се труделе да ги спасат просториите на манастирот.Деведесетгодишниот Ахмеди Зендер од Ростуше, кој како што вели е растен во манастирот, вели дека во 2020 г. „Свети Јован Бигорски“ ќе наполни илајда години од своето основање. „Во 1940-та имаше исто така пожар во манастирот, но многу помал од денешниот“, вели дедо Ахмеди. Тој додаде дека монасите добро се грижеле за сите објекти во манастирскиот комплекс, но дека имало дотраена инсталација, што засега се посочува како една од причините за пожарот.Се очекува секој момент да пристигне претседателот Ѓорге Иванов, а веќе е пристигнат директорот на Заводот за заштита на спомениците на културата, Паско Кузман.