Во акцијата за борба против пиратеријата спроведена во саботата во Дебар, од 13 правни субјекти и физички лица биле запленети 30 компјутери поради нелиценциран софтвер, како и 10 илјади пиратски цедеа, касети и друг пиратски материјал, јави дописникот на Макфакс

Овие податоци на средба со новинарите во Дебар го потврди во неделата Мите Костов, претседател на Координативното тело за заштита на интелектуалната сопственост при Владата на Република Македонија, кој дополни дека во големата акција биле вклучени инспектори од Управата за јавни приходи, Пазарниот инспекторат и Министерството за внатрешни работи. „Акцијата во Дебар е една од поуспешните, согласно со препораките на Европската комисија во Република Македонија. Има напредок во овој дел, за што има и позитивна оценка за работата на Координативното тело. Но, пиратеријата е присутна се’ уште на пазарот насекаде низ државата, од Гевгелија до Дебар, со процентна стапка од околу 63 отсто“, рече Костов. Како што додаде Николче Петковски, виш советник за економски криминал во МВР и член на Координативното тело за заштита на интелектуалната сопственост, против лицата кај кои се евидентирани неправилности во работењето ќе бидат поднесени кривични пријави. Запленетите пиратски производи, по завршувањето на судската постапка ќе бидат уништени на 11 декември, на Денот за борба против приратеријата, во депонијата Дризла во Скопје, каде што според податоците што беа презентирани годишно се уништуваат по околу 350 илјади парчиња пиратски производи.