Скопското основно јавно обвинителство ќе покрене истражна постапка против 30-годишен турски државјанин осомничен за обид за убиство во старата скопска чаршија.

Како што информираат од обвинителството, осомничениот на 23 јуни, пред кафе-бар во чаршијата, се обидел да лиши од живот едно лице, по претходна расправија и физичка пресметка.

Турчинот и уште неколку други неидентификувани лица дошле на локацијата и го нападнале оштетениот, удирајќи го со тупаници по главата и телото.

Во еден момент осомничениот извадил пиштол и упатил три истрели кон оштетениот, нанесувајќи му повреди во десната потколеница.

Бидејќи постојат околности кои упатуваат на опасност од бегство, можност осомничениот да влијае врз сведоци или да се обиде да го доврши кривичното дело, надлежниот јавен обвинител до судија на претходна постапка од Основниот кривичен суд Скопје доставил предлог за определување притвор.​​

Скопското обвинителство поведе истражна постапка против 43-годишен маж од Чаир за неовластено производство и пуштање во промет наркотични дроги.

На 23 јуни, на крстосница на булеварот „Србија“, меѓу наслебите Аеродром и Ново Лисиче, осомничениот во својот автомобил неовластено држел марихуана. Договорил продажба на дрогата за сума од 2.400 евра на непознат купувач од Драчево, па со автомобилот се упатил да му ја однесе, кога бил запрен од полициски службеници.

Потоа, бил извршен претрес и на неговиот дом во Чаир, каде било пронајдено дополнително количество дрога и дигитална вага со остатоци од марихуана. Вкупно, од автомобилот и домот на осомничениот биле запленети 2.803,53 грама марихуана во повеќе пакувања, наменета за илегална продажба.

До судијата на претходна постапка при Основниот кривичен суд Скопје јавниот обвинител достави предлог за определување притвор за осомниченото лице.​​

Синоќа полицијата извршила контрола во угостителски објект во тетовско Жеровјане, сопственост на А.А.(30) од тетовско Боговиње, пришто затекнале 12 лица, од кои 7 од Србија, 2 од Русија, 1 од БиХ и 2 од Македонија, како и 41 лице – гости во објектот.

Во објектот биле пронајдени четири безбол палки, а близина биле пронајдени две парчиња огнено оружје „шкорпион аграм 2000“, со рамка со два куршуми калибар 9мм и револвер со муниција.

„Сопственикот на објектот А.А. е лишен од слобода, а приведена е Е.З.(27) од Босна и Херцеговина, поради злоупотреба на туристичкиот престој, како и Б.А.(24) од скопски Сарај и Т.И.(21) од гостиварска Долна Бањица, кај кои биле пронајдени ножеви, додека А.Х.(23) од Германија и Џ.Л.(39) од тетовско Горно Палчиште непоседувале документи за идентификација“, соопшти МВР.

По целосно документирање на случајот, против сопственикот на објектот и другите приведени ќе следуваат законски предвидените поднесоци.