Вчера, од комплексот клиники „Мајка Тереза“ било пријавено дека кај нив бил донесен Б. С. (63) од Богданци, кој бил ангажиран за изведување градежни работи на куќа во населбата Радишани.

Имено, според пријавеното, околу 8 часот, Б. С., при изведување на работи, паднал од висина и со возило на итната медицинска помош бил пренесен во болница, каде што околу 10.45 часот починал.

По наредба на јавен обвинител, телото на починатиот е дадено на обдукција.

Четириесет и петгодишен возач од Куманово загина во сообраќајна несреќа на регионалниот пат Куманово – Свети Николе.

Како што соопшти полицијата, возачот изгубил контрола и излетал од патот, при што починал на местото на настанот.

Увид извршила екипа од СВР Куманово.

Петнаесетгодишник од селото Љубодраг влегол во вода од ископ на сепарација на реката Пчиња и починал.

Како што соопшти МВР, телото на малолетникот го пронашле и извадиле полициски службеници и граѓани што дошле на местото на несреќата.

Од страна на лекар од итната медицинска помош констатирана била смрт без траги на насилство, а по наредба на јавен обвинител, телото на починатиот му е предадено на семејството.