Синоќа на магистралниот пат Кичево – Охрид, во атарот на селото Радомирово, општина Дебарца, патничко возило управувано од Љ.В.(46) од с.Порој, Tетовско, изгубило контрола и излетало од патот, при што удрило во Е.М.(76) од Охрид и паркирано патничко возило со охридски регистарски ознаки.

Во незгодата, Е.М. се здобил со тешки телесни поврди и бил пренесен во болницата „Св.Еразмо“ за укажување лекарска помош.

Увид на местото на настанот извршил јавен обвинител и екипа од СВР Охрид.

Во тетовската полиција, С.И.(65) од Тетово пријавил злоупотреба на лични податоци од страна на лице од Делчево.

Според пријавеното, лицето на „Фејсбук“ објавило негова фотографија и навреди упатени на негова адреса.

Од МВР велат дека се преземаат мерки за расчистување и документирање на случајот.

Вчера околу 15.30 часот во селото Колибари, Кичевско, полициски службеници од Полициската станица Кичево од слобода го лишиле А.Е.(24) од селото Арангел, за кого била распишана потерница за издржување казна затвор од 12 години во Затворот „Идризово“. 

По преземени мерки и по извршен разговор со него било утврдено дека во октомври, ноември и почетокот на декември 2019 година, А.Е. со уште две лица од Гостивар, извршиле 17 кривични дела тешки кражби и кражби на подрачјето на Полициските одделенија Осломеј и Зајас. 
 
Во координација со Полициската станица Гостивар, a во врска со сторените круивични дела, од слобода бил лишен и З.И.(25) од селото Дебреште, Гостиварско, по што бил спроведен во Полициската станица Кичево. За преземените активности бил известен Јавен обвинител, а по целосно документирање на случаите, против лицата ќе бидат поднесени соодветни пријави, информира МВР.