Кривична пријава против една компанија од Охрид и нејзиното одговорно лице, македонски државјанин, до Основното Јавно Обвинителство во Струга, поднесе во понеделникот Царинската управа.

Пријавата е поднесена поради постоење на основано сомнение дека сториле кривично дело царинска измама со поднесување на лажен доказ за потекло на стоката.Осомничените, во 2011 година увозно оцариниле глазирани плочки, при што како доказ за потекло на стоката, приложиле уверение за движење заверено од царинските органи на Турција. Согласно договорот за слободна трговија помеѓу Македонија и Турција, а врз основа на приложениот доказ за потекло, на увозникот му е одобрено увозно царинење со 0% царинска стапка. Поради сомненија за веродостојноста на документот, Царинската управа го испрати на проверка приложеното уверение за движење кај царинската служба на Турција, од каде е добиен одговор дека доказот за потекло не е одобрен од тамошната царинска служба, односно не е веродостоен. Врз основа на добиениот одговор од царинската служба на Турција, Царинската управа утврди дека стоката увезена од осомничените не ги исполнува условите за преференцијален царински третман и изврши дополнителна пресметка за наплата на царинскиот долг во износ од 125 илјади денари. /крај/