Министерството за внатрешни работи (МВР) во вторникот најави дека во наредниот период ќе ги анализира сите снимки од инцидентите во Собранието и против сите одговорни ќе следуваат соодветни поднесоци.

Инцидентите во собраниската сала започнаа кога некои од пратениците со насилно и недолично однесување се обидоа да го блокираат одржувањето на закажаната седница и да го оневозможат мнозинството да ги извршува обврските кои произлегуваат од функцијата и мандатот што им го доверија граѓаните, се вели во соопштението на МВР. Потоа, според МВР, уследил напад и врз институцијата Претседателот на Собранието и со крајни напори и смирена реакција собраниското обезбедување успеало да го извлече од салата и безбедно да го спроведе Откако веќе не постоеше можност да биде доведен во опасност Претседателот на Собранието некои од пратениците продолжија со однесување од кое веројатно секој граѓанин би се засрамил, истакнуваа од МВР. Понатаму се наведува дека по истурањето вода, кршењето чаши и расфрлањето на службените документи на Претседателот на Собранието, следувало качување по неговата маса и оштетување на опремата за работа на Собранието и водење на седниците, а не изостанале ниту закани и тропање по работните маси на колегите кои, како што се наведува, не се согласувале со насилните методи. Откако ги спречија мнозинството пратеници да работат, дел од нив без мандат добиен на избори го запоседнаа местото на Претседателот на Собранието и ја узурпираа функцијата, се вели во белешката на МВР. По овие настани, уследило барање до собраниското обезбедување, согласно Законот за Собрание и Деловникот, да се обезбедат услови за одвивање на седницата.Собраниското обезбедување според сите протоколи за работа, постапи крајно професионално и создаде ред во салата овозможувајќи мнозинството на пратеници да работат, иако имаше насилни и агресивни испади и провокации кон нив, велат од МВР. Потоа, како што истакнува МВР, следеле обиди да се инсценира како некои пратеници и пратенички наводно биле нападнати, иако од видео надзорот јасно се гледа дека немаат контакт со обезбедувањето. Во моментот кога во салата беа создадени услови за продолжување на седницата, пред салата во наредните десетина минути, продолжија вербалните и физички напади врз обезбедувањето, скокањето од мебелот во фоајето и договарањето како да се излезе пред медиумите кои беа во холот, се вели во соопштението. Во извештајот на МВР од вчерашните настани, се наведува и дека 11 полициски службеници се здобиле со повреди при обидот на толпата да го пробие полицискиот кордон пред Собранието. /крај/