Осум лица од Прилеп, Битола и Струмица се уапсени во голема акција што се спровела во текот на ноќта од понеделникот кон вторникот поради основано сомневање дека злосторнички се здружиле и го оштетиле Буџетот за 3,2 милиони евра, соопшти Финансиската полиција.

Заедно со нив делувал и еден триесет и петгодишен државјанин на Србија, кој бил недостапен за органите на прогонот и по него се трага.

Уапсените, во вторник ќе бидат изедени пред Истражен судија, а по сослушувањето ќе се одлучи дали ќе им биде одреден притвор.

Осумтемина се товарат дека во текот на 2010, 2011, 2012 година биле организирани од пријавениот Р.К. од Битола, сопственик и управител на „Римкос трејд“ ДООЕЛ Битола, со цел да се стекне со противправна имотна корист. Групата имала задача да изготвува фактури со невистинита содржина и да врши нелегални финансиски трансакции.

Целта на групата била да ги прикрие нелегално набавените секундарни суровини – отпад, така што преку правните субјекти „Маргони“, „Шане Тон“, „Виктори Тим“, „Латерна Трејд“, „Фруит Трејд“ и „Џоле 2011“, циркулираат фактури со невистинита содржина со кои е прикриено вистинското потекло на отпадот, а врз основа на кои организаторот на криминалната група прикажал неоснован поврат на ДДВ и ја намалил обврската за ДДВ.

Р.К.за одреден паричен надомест ангажирал и странски државјанин , без престој во Македонија, кој само формално е сопственик на правен субјект, а со кој целосно управува Р.К.

Криминалната група на крајот на годината, со остварена цел, ги продавале претпријатијата со фиктивни фактури на лица со дебело криминално досие и низок социјален статус, за да избегнат задолжителни ДДВ пријави за работењето, со што мислеле дека ќе ја избегнат кривичната одговорност.

Членови на криминалната група на Р.К. од Битола се: Т.Ш. (35) и Е.Ш (38) од Битола, сопственици и управители на „Шане Тон“ ДОО Битола и на „Фруит трејд“ ДООЕЛ Битола, потоа Г.Г. (35) од село Моноспитово, струмичко, сопственик и управител на „Маргони“ ДООЕЛ Моноспитово и „Латерна “ ДООЕЛ Моноспитово.

Потоа, Д.Р. (55) од Прилеп, сопственик и управител на „Шане тон“ Битола и „Маргони“ Моноспитово, Ѓ.Ј. (35) од село Градошарци, струмичко, сопственик и управител на „Џоле 2011“ ДООЕЛ Битола, Д.Т. (35) од Вичин, Србија, сопственик и управител на „Виктори Тим “ ДООЕЛ Кичево.

Г.П (35) од Прилеп, сопственик и управител на „Латерна трејд“ ДООЕЛ, село Моноспитово и Н.Т. (30) од Битола управител на „Римкос трејд“ ДООЕЛ Битола.

Членовите на злосторничкото здружение во текот на 2010, 2011 и 2012 година со изготвување на фактури со невистинита содржина не пријавиле и не уплатиле ДДВ во износ од 172.394.192 денари и персонален данок на доход од 29.238.790 денари со што го оштетиле Буџетот на Македонија за вкупен износ од 201.632.982 денари или околу 3,2 милиони евра./крај/мф/бб