Црна хроника
Полицајци ограбиле мигранти
Министерството за внатрешни работи откри и пријави тројца полициски службеници заради инволвираност во кривични дела, откако претходно во близина на Кота 4 -Гевгелија, полициски службеници од Полициската станица за Граничен премин и Граничен надзор „Богородица“, при илегално минување на државната граница од Грција во Македонија, открија 11 лица државјани на Сирија, Бенин, Еритреа, Авганистан, Гана и Бурма.
Лицата, согласно процедурите беа приведени во полициските простории, а при приведувањето не пружија отпор и против истите не се превземани средства за присилба. Поради основ за сомневање за сторено од кривично дело страна на полициски службеници, беше известен Секторот за внатрешна контрола и професионални стандарди, кои го презедоа случајот за понатамошна постапка.
По преземените мерки и активности, Секторот за внатрешна контрола поднесе кривична пријава до Основното јавно обвинителство во Гевгелија, против К.П.(40), П.М.(37), двајцата од Прилеп и Б.Ѓ.(28) од Гостивар, сите полициски службеници од Полициската станица од општа надлежност „Прилеп“, поради постоење на основано сомнение дека при преземање на активности за фаќање и лишување од слобода на група емигранти, од истите одзеле девизни средства во износ од околу 300 евра како и осум мобилни телефони, со што сториле кривично дело „злоупотреба на службената положба и овластување“, предвидено и казниво по член 353 од Кривичниот законик на Република Македонија.
Имено, на подрачјето на Регионалниот центар за гранични работи „Југ“, униформираните полициски службеници, кои во моментот извршувале службени задачи за потребите на „Посебната единица за обука и подршка“, добиле информација дека група од 15-тина лица се движат долж државната граница од Р.Грција кон влез во Р.Македонија. Веднаш по добиената иформација, полициските службеници презеле активности за фаќање на групата. Притоа се фатени 11-те мигранти при што, пред да бидат приведени во Полициска станица, на самото место им бил извршен преглед и одземени девизни парични средства и мобилни телефони без притоа да им биде издадена потврда за привремено одземени предмети.
По извршениот преглед на 11-те мигранти, истите биле приведени во Полициската станица за гранични проверки и граничен надзор – Богородица – железнички премин. Од извршените разговори во Полициската станица дел од приведените мигранти пријавиле дека од страна на полициските службеници кои го извршиле приведувањето, им биле одземени девизни средства и мобилни телефони.
По извршените разговори со мигрантите, од петмина мигранти се земени записници поради постоење на основано сомнение за сторено кривично дело „Злоупотреба на службена положба и овластување“. Врз основа на Наредба издадена од Истражен судија при Основен суд Гевгелија извршен е претрес над тројцата пријавени полициски службеници како и претрес на патничките моторни возила, сопственост на двајца од нив. Притоа, кај К.П. се пронајдени три мобилни телефони и 155 евра, кај П.М. се пронајдени три мобилни телефони и 130 евра, додека кај Б.Ѓ. се пронајдени два мобилни телефони и 10 евра.
Покрај ова, извршено е препознавање над полициските службеници, при што од двајца оштетени е посочен полицискиот службеник Б.Ѓ., а од еден оштетен е препознат полицискиот службеник П.М. Останатите оштетени не ги препознале пријавените полициски службеници но препознале два мобилни телефони што претходно им биле одземени од страна на полициските службеници.
Вчера, во текот на попладневните часови, пријавените полициски службеници беа изведени пред надлежен Истражен судија при Основниот суд во Гевгелија, кој им изрече мерка притвор во времетраење од осум дена.
Инаку во споредба со периодот до септември минатата година кога беа откриени 532 илегални мигранти на територијата на државава, годинава во текот на деветте месеци заклучно со септември таа бројка е речиси двојно зголемена односно изнесува 908 откриени странски мигранти кои се обидувале илегално да направат транзит низ нашата земја. Најмногу од мигрантите се од Сирија (100) потоа следат од Авганистан (77) како и соседен Пакистан (70). Исто така евидентно е дека најголем е напливот на илегални мигранти од јужната граница со соседна Грција при што бројката на откриени мигранти во споредбениот период е тројно зголемена./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Тројца скопјани искасани од кучиња скитници
МВР извести дека изминатиот ден тројца скопјани пријавиле каснување од куче скитник, во полициските станици.
На 23.04.2024 во 17.30 часот во Полициската станица Центар, 34-годишната Д.С. од Скопје пријавила дека во населбата Маџир Маало во Скопје, нејзината малолетна ќерка била касната од куче скитник.
На 23.04.2024 во 14.45 часот во Полициската станица Карпош, 44-годишната И.Ф. од Скопје пријавила дека на улицата „Митрополит Теодосиј Гологанов“ во Скопје била касната од куче скитник.
На 23.04.2024 во 11.55 часот во Полициското одделение Сарај, 70-годишниот А.П. од Скопје пријавил дека кај Спортско рекреативен центар „Сарај“ бил каснат од куче скитник.
Црна хроника
Уапсен прилепчанец, побегнал од затворот во Куманово
Вчера во 20.30 часот во Велес, полициски службеници од СВР Велес го лишиле од слобода 29-годишниот Е.М. од Прилеп, извести МВР.
„Тој бил баран со централна потерница врз основа на наредба од Казнено – поправната установа Затвор – Куманово, поради бегство од затворот“, соопшти МВР.
Лицето било спроведено во установата за доиздржување на затворска казна од една година, три месеци и седум дена.
Црна хроника
Уапсен Турчин на Деве Баир, на увид дал фалсификувани документи
Вчера во 20.25 часот на Граничниот премин Деве Баир, полициски службеници го лишиле од слобода 44-годишниот М.Д. од Република Турција, кој управувал товарно возило „мерцедес“ и полуприколка со турски национални ознаки, поради тоа што при извршена пасошка контрола и проверки било констатирано дека двете меѓународни зелени карти за осигурување биле фалсификувани, извести МВР.
Тој бил предаден на полициски службеници од Полициската станица Крива Паланка за понатамошна постапка.