Жител на Градско вчера дошол во дворот на А. С. (лице со здравствени проблеми) на улицата Борис Трајковски и му дал 1.000 денари за да гласа за одредена политичка партија.

Од страна на полициски службеници извршен бил разговор со П. Е., старател на А. С., и со потврда банкнотата билa одземена. Бил извршен разговор и со П. А., а СВР Велес презема мерки за целосно расчистување на случајот.

Во периодот од 15 часот на 14.7.2020 до 9 часот на 15.7.2020 во с. Сакулица, Кратовско, непознат сторител со употреба на сила и погоден предмет насилно влегол во црквата „Св. Харалампие“ и одзел пари, алат и икона.

Извршен бил увид од екипа од Полициската станица Кратово. Се преземаат мерки за расчистување на случајот.

Малолетен мигрант бил пронајден во багажник на автомобил во Неготино. Возачот на возилото и другите мигранти кои биле во него избегале.

Според информациите на МВР, вчера во 12:30 часот кај тунелите на патот Удово – Демир Капија било забележано возило „бе-ем-ве“, со скопски регистарски ознаки, во кое имало мигранти.

Подоцна возилото било пронајдено во непосредна близина на плацот на ЈП „Комуналец“ во Неготино.

Еден мигрант, 16-годишник од Сирија, останал во багажникот од возилото, а возачот и останатите мигранти избегале. На местото на настанот бил извршен увид, известен е Јавен обвинител, а возилото било однесено во депото во Кавадарци.

Пронајдениот мигрант бил задржан во прифатниот центар во Гевгелија и се преземаат мерки за расчистување на случајот.