Дваесет икони и црковни предмети се дел од збирката украдени предмети која при акција на полицијата во Тирана во октомври годинава беше откриена и одземена од албански државјанин.

По извршен увид од страна на македонски претставници предметите се идентификувани и истите најверојатно се украдени од црквите од селата Радожда, Буринец и Селце од Струшкиот регион како и селата Ѓавато и Перово од Битолскиот регион.

Помеѓу идентификуваните предмети се и царски двери кои претходно биле исечени, но истите се составени од страна на албански експерти-историчари на уметност.

За дел од идентификуваните икони веќе се публикувани монографии и научни трудови.

Меѓу нив се наоѓаат и две икони кои се лично изработени од страна на Дичо Зограф, а за други три икони кои потекнуваат од црква во с.Радожда – Струшко, трага и ИНТЕРПОЛ.

Албанскиот Јавен обвинител, за потребите на Судската истрага, побара најдоцна во рок од 15 дена да биде доставена соодветна документација односно досие за потеклото на секоја од иконите поодделно.

Во координација со претставници од Министерството за култура во тек е изготвување на наведената документација која во прилог ќе содржи и научна публикација каде се објавени иконите./крај/мф/ап