Триста килограми марихуана заплени полицијата и уапси три лица во село Радожда, струшко, во понеделник, со што е пресечен меѓународен канал за транспорт на марихуана од Албанија до земјите во западна Европа, соопшти Министерството за внатрешни работи.

Вчера околу 15 часот, по претходно добиена информација за сомнителни активности во близина на село Радожда, Струга, полицијата поставила заседа во близина на местото викано Ледиње каде што биле забележани девет полни патнички торби.

Околу 16.30 часот од страна на полициските службеници било забележано едно патничко моторно возило со кичевски регистерски таблички и две лица кои се приближиле до патничките торби и започнале да ги товараат торбите во возилото.

По реакција на полициските службеници, уапсени се А.А (42) и Л.М. (33) двајцата од Кичево, од кои Л.М. е полициски службеник во полициската станица за обезбедување на државната граница „Стрезимир”.

По извршениот преглед на патничките торби утврдено е дека истите се полни со 206 пакувања марихуана облепени со кафеава селотејп трака, со вкупна тежина од околу 300 килограми.

Според досегашните сомненија истата потекнува од Албанија и со кајче била илегално внесена во земјава. Запленетата марихуана најверојатно била намената за продажба на нарко пазарот во земјите на западна Европа, каде би достигнала цена меѓу еден до два милиона евра во зависност од тоа дали би се продавала на големо или на мало.

Во разговор со полицијата, А.А. рекол дека имал претходен договор со друг полициски службеник И.Г. (32) во ПС за ОДГ „Стрезимир” кој му дал инструкции каде да ја преземе марихуаната. Врз основа на инструкциите, заедно со полицискиот службеник кој е приведен на лице место, за паричен надомест од 9.000 евра, наводно требало да ја транспортира марихуаната до Кавадарци каде што требало да ја преземе друго лице./крај/мф/сд