Во текот на минатата недела и викендот, царинските службеници открија повеќе обиди за криумчарење стока, при што привремено се задржани девизи, цигари, облека, сребрени производи, бижутерија, ташни, марами, инсектициди, лепенки за гуми, батерии, разни ПВЦ производи, техничка стока, козметички производи, марихуана и фалсификати.

На аеродромот Александар Велики, при личен претрес на македонски државјанин, кој имал намера да отпатува за Тревизо, биле откриени 7.700 евра. На прашање на царинските службеници, патникот рекол дека носи девизи колку што е дозволено, но при извршен претрес, во џебот од неговата кошула пронајдени се 9.700 евра. Согласно законските прописи на патникот му се вратени 2.000 евра, износ што резидент може слободно да го изнесе од државата.

На граничниот премин Ново Село, при контрола на патничко моторно возило со македонски регистарски таблички, управувано од македонски државјанин, пријавено за влез во државата, биле откриени 19 грама марихуана. Под гумената стапка на задното лево седиште пронајдено е едно пакетче од 10 грама непозната материја, а помеѓу двете предни седишта до рачната сопирачка, во пакување од влажни марамици пронајдени се уште 9 грама од истата материја. При извршен проверка со тестер за наркотици утврдено е дека се работи за наркотична дрога марихуана. Дрогата и автомобилот се предадени на Сектор за недозволена трговија со дрога при Министерствот за внатрешни работи.

Во два посебни случаи на граничниот премин Деве Баир, при контрола на две патнички возило со бугарски регистарски таблички, управувани од бугарски државјани, пријавени за излез од државата, биле откриени 40 штеки цигари со македонски акцизни маркички.

Во првиот случај пронајдени се 26 штеки цигари FILTER 5 blue, FILTER 57gold, PAL MAL BLUE и PAL MAL AMBER, а во вториот случај пронајдени се 14 штеки цигари FILTER 5 blue, EVA SLIMS, RODEO BLUE и BENSTON WHITE. Цигарите се пронајдени во праговите и во фабричка празнина во багажниот простор на возилата.

На граничниот премин Богородица, при контрола на патничко моторно возило со италијански регистарски таблички, управувано од македонски државјанин, пријавено за влез во државата, биле откриени 1.368 модни додатоци-бижутерија (гердани, алки, шноли и друго), 15 часовници, 21 пара наочари за сонце, 7 употребувани мобилни телефони и 16 употребувани сребрени предмети (накит и лажички) со маса од 106,25 грама.

Непријавените производи пронајдени се во рачна ташна на сопатникот, исто така македонски државјанин, како и во багажниот простор на возилото, помеѓу личните работи на патниците./крај/мф/бс