Министерката за внатрешни работи, Гордана Јанкулоска, во четвртокот во центарот за обука во Идризово присуствуваше на промоцијата на новата Единица за јавен ред и мир и интервенции во рамки на организациските единици за општа безбедност и полициски станици од општа надлежност при СВР Скопје.

Таа за време на настанот истакна дека Република Македонија како дел од модерните европски држави мора да ги следи новите техники и методи со кои располагаат македонските партнери од Европа за соочување со предизвиците во нивните поголемите градови, и применување на истите во најголемиот македонски град Скопје.

„Предизвиците со коишто се соочуваме во Скопје се предизвици со кои се соочуваат жителите на сите поголеми градови. Затоа и средствата со коишто располагаме за справување со овие предизвици, цениме дека треба да бидат на ниво на средствата и новите методи и техники со кои располагаат нашите партнери од Европа”, истакна Јанкулоска.

Таа потенцираше дека секаде во Европа и во регионот веќе одамна биле формирани вакви единици, при што нивна основна задача ќе биде воспоставување на нарушен јавен ред и мир од поголем обем со цел заштита на животот и имотот на граѓаните.

„Единицата за ЈРМ и интервенции ќе се грижи околу одржување на јавниот ред и мир на јавни собири од сите видови, почнувајќи од спортски и културни манифестации, најавени и ненајавени собири на граѓани и други форми на незадоволства на граѓани искажани преку организирани или неорганизирани јавни собирања”, истакна министерката за внатрешни работи.

Јанкулоска додаде дека Единицата за ЈРМ и интервенции, покрај вонредни, редовни, посебни обезбедувања, асистенции и спроводи, ќе биде поддршка и на Полициските станици од општа надлежност во извршување на нивните секојдневни задачи како интервентна единица.

Единицата за ЈРМ и интервенции предвидено е да биде со посебна внатрешна организација, и опремена со специјална опрема за одржување и воспоставување на јавниот ред и мир и извршување на други посложени безбедносни задачи./крај/мф/ап