Четириесетгодишен скопјанец вчера во полиција пријавил дека неговата 16-годишна ќерка била ограбена и уценувана од група малолетници на подрачјето на општина Чаир.

Според пријавеното, настанот се случил на 7 мај околу 08:00 часот наутро. Неколку малолетници со закана со остар предмет пресретнале 16-годишна тинејџерка и ѝ одзеле пари. Освен грабежот, ја уценувале и дека ќе мора повторно да им даде пари во текот на наредните денови.

Од Министерството за внатрешни работи информираат дека веднаш по пријавата се преземаат сите неопходни мерки од страна на надлежните служби за целосно расчистување и документирање на случајот.

Дваесет и двегодишен охриѓанец е тешко повреден откако рано утринава со своето возило излетал од коловозот во Охрид, управувајќи под дејство на алкохол.

Како што информираат од Секторот за внатрешни работи Охрид, несреќата била пријавена утринава (18.05.2026 година) во 05:25 часот. Настанот се случил на улицата „7 Ноември“ кога патничко возило марка „цитроен“ со охридски регистарски ознаки, управувано од И.Р. (22) од Охрид, изгубило контрола и излетало од патот.

Во несреќата возачот се здобил со тешки телесни повреди, кои биле констатирани во „Свети Еразмо“ во Охрид, каде што е пренесен за укажување лекарска помош.

Од полициските проверки извршени на местото на настанот, било утврдено дека И.Р. го управувал автомобилот под дејство на алкохол, при што му биле измерени 1,61 промили алкохол во крвта.

По наредба на јавен обвинител, увид на местото на несреќата извршила увидна екипа од СВР Охрид.

Осумнаесетгодишна девојка пријавила дека била нападната со остар предмет пред дискотека во Скопје.

Според информациите на МВР, вчера во 20:00 часот во СВР Скопје, 18-годишната Т.Р. од Скопје пријавила дека околу 03:00 часот пред дискотека на подрачјето на Карпош во Скопје била физички нападната од едно лице, кое употребило остар предмет и ѝ нанело повреда.

Се преземаат мерки за расчистување на случајот.