Пет лица, меѓу кои еден полицаец, се уапсени за грабежот во поштата во скопско Буковиќ од каде што беа украдени над милион денари, а што се случи минатиот вторник.

Министерството за внатрешни работи го расчисти разбојништвото што минатиот вторник беше извршено во експозитура на АД Македонска пошта во  село Буковиќ. За кривичното дело се товарат пет лица на возраст од 22 до 36 години од кои три лица од село Семениште, едно од Сарај и едно од Черкези, кумановско. На сите петмина им е одредена мерка притвор во времетраење од 30 дена, а еден од осомничените е полициски службеник кој во моментов работи во Полициската станица од општа надлежност Карпош. Петмината се товарат дека извршиле кривично дело „разбојништво“, при што се стекнале со противправна имотна корист од околу 1.108.000 денари.

Петмината осомничени на 8-ми јули, маскирани со фантомки на главите и вооружени со автоматска пушка и пиштол, влегле во поштата каде во моментот имало тројца вработени. Разбојниците го впериле оружјето кон нив и им наредиле да ги кренат рацете, заканувајќи се дека ќе им пукаат во нозете. Потоа влегле во работниот простор зад шалтерскиот дел и му наредиле на благајникот да ја отклучи металната каса којашто се наоѓала во просторијатаи во која имало околу милион денари. Во исто време едниот од крадците во фиоката во шалтерскиот пулт која ја користи благајникот, пронашол и одзел околу 108.000 денари и сите пари ги ставиле во една вреќа,  која ја пронашле во просторијата.

Во тој момент, до влезната врата од поштата дошол пензионер кој што сакал да влезе внатре и да подигне пари од пензијата меѓутоа бил забележан од разбојниците и му наредиле и тој да влезе во помошната просторија каде што биле затворени тројцата вработени.

Откако ги зеле парите, сторителите со автомобил се упатиле кон излезот од село Буковиќ, на стариот пат Скопје-Тетово каде ги чекал друг автомобил. Откако се префрлиле во возилото заминале во село Семениште, во старата куќа на еден од крадците каде што ги поделиле парите и ја запалиле празната вреќа и фантомките.

Инаки, поголем дел од пријавените и претходно се познати на полицијата, а од страна на судовите им се изрекувани и затворски казни за сторени кривични дела „учество во тепачка“, „насилство“, „тешка кражба“ и „недозволена трговија со оружје“. Лицето од Куманово во 2009 година со помош на Интерпол било уапсено и во Осло, Норвешка, поради основано сомнение за недозволена трговија со наркотици.

Министерството за внатрешни работи продолжува да работи на расчистување и на други дела сторени од оваа криминална група.крај/мф/сд