Црна хроника
„Ќелија 3“: Уапсените припадници на IS посетувале верски предавања на радикални имами во Скопје и Куманово
Петмината македонски дравјани кои беа уапсени во Турција под сомнение дека се припадници на терористичката Исламска Држава (ИС) биле заведени од џихадисти во Македонија и посетувале верски предавања на радикални имами во нивните градови каде започнало нивното индоктринирање и радикализирање во кое биле инволвирани лица опфатени во претходните акции „Ќелија“, соопшти Министерот за внатрешни работи, Митко Чавков.
Акцијата којашто била спроведена во соработка на македонската и турската полиција, била изведена на 12 август во едно од собиралиштата на џихадисти лоцирано во населбата Аксарај.
Во собиралиштето осомничените биле сместени заедно со уште четири лица од Албанија, Сирија, Палестина и Мароко и чекале поволни услови за трансфер во Сирија.
При апењето две лица се обиделе да избегаат, при што се здобиле со тешки повреди. По апењето лицата биле однесени во Прифатниот центар за странци во Истанбул.
Тројца од уапсените се од Куманово, а двајца од Скопје. Двајца кумановци на возраст од 21 и 24 година заминале за Турција на 22-ри минатиот месец со автобус, при што оствариле излез на Граничниот премин Табановце, за потоа преку Ниш и Софија да пристигнат во Истанбул, додека останатите три лица, едно од Куманово и две од Скопје на возраст од 18, 19 и 20 години, заминале за Турција кон крајот на минатиот месец исто така со автобус, но преку Граничниот премин Богородица.
За две од лицата нивното исчезнување било пријавено и во полиција од страна на нивните родители.
Според сознанијата на МВР, лицата претходно биле поттикнати и организирани од македонски државјани-џихадисти кои подолг период престојувале во Сирија, а осомничените заминале за Турција со единствена крајна цел приклучување кон муџахединските единици во Сирија.
„По преземените активности и документирањето на настанот осомничените биле вратени во Македонија и против нив е поднесена кривична пријава поради постоење основи на сомнение за сторено кривично дело „учество во странска војска, полиција, паравоени или параполициски формации“ согласно член 322-а став 9 од Кривичниот Законик на Република Македонија. По поднесувањето на кривичната пријава од страна на судија на претходна постапка на сите пет пријавени лица определена им е мерка притвор“ изјави Чавков.
Министерството за внатрешни работи и во периодот што претстои продолжува со преземање на понатамошни мерки и активности за обезбедување на докази и против други лица вклучени во индоктринирање, помагање и логистика за испраќање на лица во редовите на муџахединските единици во Сирија и Ирак.
Исто така освен акцијата со турската безбедносни сили по претходно обезбедени сознанија, во соработка со албанската полиција на 14-ти август во Тирана беше уапсено уште едно лице по кое се трагаше, а беше опфатено во акцијата Ќелија која се спроведе август минатата година. По распишаната меѓународна потерница лицето беше приведено и во тек е постапка за негова екстрадиција.
Ова е трето продолжение на акцијата „Ќелија“. Првите 11 уапсени кои се товарат дека соработувале со екстремната сунитска организација Исламската држава ја признаа вината и се осудени, а во акцијата „Ќелија 2“ беше поднесена кривична пријава против седум лица, четворица беа уапсени, а тројца недостапни за полицијата.
Меѓу осудените има и еден Македонец, а меѓу нив е и Имамот од Тутунсуз џамијата во Скопје./крај/мф/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Мотоциклист удри во пешак на „Партизанска“, двајцата повредени
Синоќа, на булеварот Партизански одреди во Скопје, мотоцикл „дукати“, со скопски регистарски ознаки, управуван од Е. П. (27) од Скопје, удрил во пешакот Н. Ѓ. (30) од с. Рашче, Скопско.
Во несреќата тешки телесни повреди добил пешакот, а мотоциклистот добил телесни повреди, констатирани во комплексот клиники „Мајка Тереза“ Скопје, објави МВР.
Извршен бил увид од екипа на СВР Скопје.
Црна хроника
Почина затвореник во Идризово
Вчера во 19:15 часот во СВР Скопје, од Казнено поправна установа Идризово Скопје било пријавено дека Р.Ф.(52) од с.Речане-гостиварско (осудено лице) починал, а лекар од Итна медицинска помош констатирал смрт без видливи знаци на насилство.
Извршен бил увид од увидна екипа од СВР Скопје.
По наредба на јавен обвинител телото на починатиот било предадено на обдукција.
Црна хроника
Украден сеф со пари од продажен објект во Карпош
Во 03.20 часот во СВР Скопје било пријавено дека во продажен објект на подрачјето на Карпош, од страна на непознати сторители, со употреба на физичка сила било влезено и одземен бил сеф со пари.
Се преземаат мерки за расчистување на случајот.