Драмата на натпреварот помеѓу Данска и Украина за среќа имаше позитивен исход. Данскиот фудбалер Кристијан Ериксен (34) се струполи во 65-та минута, но по десетминутна медицинска интервенција, стана и сам го напушти теренот, проследен со аплауз од трибините. Натпреварот заврши кратко потоа, во 79-та минута.

Сцените потсетуваа на Европското првенство во 2021 година, кога Ериксен доживеа срцев удар, и овој пат играчите формираа круг околу него додека му помагаа. Тој го напушти теренот со помош на сопругата.

Докторот на данската репрезентација, Мортен Боесен, зборуваше за состојбата на Ериксен.

„Кристијан е добро и сам го напушти теренот. Колку што можам да видам, дефибрилаторот работеше како што требаше. Извесно време ја изгуби свеста, но многу брзо ја врати и набрзо повторно стапивме во контакт со него“, рече Боесен.

Тој подетално опиша што се случило за данската ТВ2: „Мислам дека го видов како се фаќа за градите, а потоа се струполи. Доста брзо се освести, мислам дека уредот добро работеше и го врати во живот.“

Да ве потсетиме дека по инцидентот на натпреварот против Финска на ЕП во 2021, на Ериксен му беше вграден дефибрилатор. Овој уред користи електроди за следење на срцевиот ритам, а доколку детектира опасни отчукувања, испорачува електричен шок за да ги нормализира.

„Сега треба да се направат дополнителни тестови во болницата за да се утврди што го предизвикало инцидентот. Постојано сме во контакт со него и со лекарите во болницата. Кристијан е добро и ме замоли да ги поздравам сите играчи и да им кажам дека е добро“, додаде Боесен.

Фото: ЕПА

Јавен обвинител од Основното јавно обвинителство Скопје донесе Наредба за спроведување истражна постапка против две лица за кои постои основано сомнение дека како соизвршители сториле кривично дело – убиство во обид.

„На 6 јуни, во близина на авто плац во селото Шишево, двајцата браќа на возраст од 43 и 44 години, со умисла се обиделе да лишат од живот едно лице, а притоа го довеле во опасност и животот на двајца други оштетени. Повод за тоа било претходен сообраќаен инцидент во кој братот на оштетениот и првоосомничениот со нивните возила, на разминување, се допреле со ретровизорите и започнале вербална расправија. Осомничениот го фатил за врат и му се заканил, но двајца сведоци на настанот успеале да ја смират ситуацијата. Нападнатиот ја зел сопругата од работа и го повикал брат му за да провери дали по истиот пат можат безбедно да се вратат назад. Во близина на местото на првиот инцидент, во една од грмушките, двајцата осомничени браќа со пиштоли ги очекувале да поминат. Првоосомничениот испукал два куршумa, при што го погодил братот на првично нападнатиот во главата, нанесувајќи му тангенцијална повреда, а ги загрозил и другите две лица“, соопшти Обвинителството.

Бидејќи постојат околности што укажуваат на опасност од бегство, особени околности укажуваат дека ќе ја попречуваат истрагата со влијание врз сведоците и особени околности кои го оправдуваат стравот дека ќе го довршат обиденото кривично дело, јавниот обвинител до судијата на претходна постапка достави предлог за определување мерка притвор за двајцата осомничени соизвршители

Рускиот министер за надворешни работи Сергеј Лавров изјави дека целосното обновување на правата на говорниците на руски јазик во Украина е еден од клучните услови за постигнување долгорочно решение на војната.

Москва со години го обвинува Киев за дискриминација на руската малцинска заедница и граѓаните кои зборуваат руски јазик. Кремљ токму тврдењата за јазична дискриминација и, како што наведува, русофобија ги користеше како едно од главните оправдувања за започнување на целосната инвазија врз Украина во 2022 година.

Лавров ги повтори тие обвинувања вчера во видеопорака објавена по повод Денот на рускиот јазик.

„Меѓу нашите апсолутни приоритети се заштитата и поддршката на оние на кои рускиот им е мајчин јазик,“ рече Лавров. „Ќе продолжиме решително да се спротивставуваме на сите облици на јазична дискриминација и русофобија, каде и да се појават.“

Особено се осврна на Украина, тврдејќи дека Русија „сигурно ќе постигне“ обновување на правата на говорниците на руски јазик, за кои вели дека биле мета на украинските власти.

„Решавањето на тоа прашање е еден од нужните услови за долгорочно решение на украинскиот конфликт,“ рече Лавров.

Изјавата на Лавров доаѓа ден откога рускиот претседател Владимир Путин го одби предлогот на украинскиот претседател Володимир Зеленски за директна средба.

Фото: Депозитотос