Сопственикот на „Фиком“, Никола Николиќ кој утрото во понеделникот беше пронајден обесен во затворот во Штип, не покажувал никакви знаци на психички заболувања, не користел антидепресивна терапија и не боледувал од никакви хронични болести, соопштуваат од Управата за извршување на санкции во официјалното соопштение за смртта на Николиќ.

Неговиот адвокат Александар Петровски утрово бил информиран дека неговиот клиент бил пронајден обесен. Николиќ наскоро требало да го искористи својот прв слободен викенд од кога започнал да ја издржува затворската казна. Николиќ е осуден на казна затвор во траење од 25 години и два месеца за повеќе кривични дела „измама“, а во тек била и нова кривична постапка пред Основниот суд Скопје 1. Неговиот адвокат вели дека била започната постапка за определување на единечна казна од 15 години.Николиќ бил пронајден обесен утрово околу 6.30 часот од страна на другите осуденици во тоалетот во крилото каде што престојувал.„Одговорните надзорници на смена веднаш се упатиле во просторијата, каде осуденото лице Никола Николиќ го затекнале со јаже (манила) околу вратот. Веднаш била повикана Итната медицинска помош, при што од страна на лекарите била констатирана смрт. За настанот се известени надлежните органи, а на лице место присуствуваа судија на претходна постапка и јавен обвинител кои извршиле увид на лице место“, соопштуваат од Управата.Од затворот во Штип велат дека не можат ништо да кажат, бидејќи увидот е во тек. Николиќ беше осуден за измама на повеќе десетици граѓани, продаваше еден исти стан на повеќе потенцијални станари. Зградите кои ги изгради во скопската населба Кисела Вода стојат запуштени и празни, а граѓаните сé уште не ги добиле своите станови, ниту се обештетени./крај/мф/ффс