Скопјанец им основал фирми на социјални случаи, поднесувал фалсификувани ДДВ пријави до Управата за јавни приходи и зел повеќе од 95.000 евра по основ поврат на ДДВ.

Тој најпрвин ја основал фирмата КАМПИРИ ТРЕЈД ДООЕЛ Скопје во која како управител и овластен потписник на банкарската сметка поставил лице од Скопје, со низок социјален статус кој својата егзистенција ја остварува со собирање на отпадоци и поправка на велосипеди. Преку оваа фирма во текот на 2013 година употребиле фалсификувана ДДВ пријава во која прикажале невистинити податоци за влезниот промет за наводно извршени набавки на стоки и услуги без да постои соодветна документација – фактури како и извршено плаќање на добавувачи. Со тоа ги измамиле службените лица на УЈП и противзаконски и неосновано извршиле поврат на ДДВ и го оштетиле Буџетот на Република Македонија за износ од  49.000 евра. За добро завршената работа организаторот на криминалната шема му исплатил  90.000 денари на социјалецот, а остатокот од парите ги задржал за себе.Потоа отворил друга фирма со назив САЛИОВ ФЕШН ДООЕЛ Скопје каде друго лице го назначил за управител и овластен потписник на банкарската сметка на која требало да пристигнат парите од УЈП. И за оваа фирма, пријавениот до Управата за јавни приходи во 2013 година доставил фалсификувана ДДВ пријава во која било искажано побарување за поврат на ДДВ иако фирмата буквално немала никаква деловна активност. Откако Управата за јавни риходи го одобрила повратот на ДДВ-то за САЛИОВ ФЕШН ДООЕЛ Скопје во износ од 46.000 евра, организаторот заедно со „управителот“ на фирмата, од банката ги подигнале во кеш сите пари. Организаторот ги зел сите пари, а на „управителот“ му дал само дневница.Финансиската полиција против трите осомничени лица до Основното јавно обвинителство во Скопје поднесе кривична пријава за сторени кривични дела „Измама“, „Фалсификување и уништување деловни книги“ и „Поттикнување“./крај/со