Пијан направил сообраќајка и избегал, а кога го фатиле се степал со полицајците, кривична за 29-годишник од Дебар

Полицијата од Дебар поднесе кривична против А.Љ.(29) од Дебар, поради постоење основи на сомнение за сторени кривични дела „безобѕирно управување моторно возило“ и „напад врз службено лице при вршење на работи од областа на безбедноста“.

„Тој, на 29.05.2026 во 23 часот, на улицата ’Зеќир Чанка’ во Дебар бил лишен од слобода затоа што управувајќи моторно возило ’поло’ со дебарски регистарски ознаки, предизвикал сообраќајна незгода и избегал, а потоа физички нападнал полициски службеници. Откако е лишен од слобода, утврдено е дека немал положено возачки испит и по извршено алкотестирање кај него се констатирани 2,75 промили алкохол во крвта“, соопшти полицијата.