Во саботата, при вршење на контрола на патниот сообраќај на крстосницата од улиците „Ленинова“ и „24-ти Октомври“ во Струмица, околу 14.30 часот од страна на полициски службеници било сопрено возило „фиат“ во кое е најдена копија од избирачки список и список со имиња и матични броеви на лица, соопшти во неделата министерството за внатрешни работи.

Возилото било управувано од 52-годишниот Б.Г. од Струмица, а во кое како сопатници биле и лицата Е.Ф. (44), А.А. (32), А.А. (55) и К.А. (37), сите од Струмица.

При првичниот преглед на возилото, во багажниот простор била пронајдена копија од избирачки список, како и тетратка со име и презиме и матични броеви на лица од ромска националност и броеви на избирачки места каде истите треба да го остварат своето право на глас.

Поради постоење основи на сомнение дека лицата се сторители на кривичните дела „злоупотреба на лични податоци“, „повреда на слободата на определување на избирачите“ и „поткуп при избори и гласање“ било известено Основното јавно обвинителство во Струмица. Од Судија на претходна постапка била добиена наредба за личен претрес на наведените лица, за претрес на возилото и за одземање на мобилните телефони. Постапено е по истите наредби и согласно обезбедените докази ќе биде поднесен соодветен поднесок до Основното јавно обвинителство./крај/мф