Топ
Поранешниот прилепски градоначалник осомничен за криминал со државно земјиште
Против поранешниот градоначалник на Прилеп, Маријан Ристески, и уште осум лица, како и против две правни лица, поднесена е кривична пријава за злоупотреба на службената положба и овластувањето, информираат од МВР.
Обвинетите, меѓу кои поранешен градоначалник, државен правобранител, нотар и раководители од Прилеп во својство на одговорни лица, со пречекорување на своите овластувања, а со намера да овозможат противправна имотна корист за правното лице од Прилеп, во 2012 и 2013 година отуѓиле градежно земјиште во сопственост на државата, со што му е предизвикана штета на буџетот во износ од 7.749.698 денари.
Обвинението, како што информираат од МВР, е поднесено против М. Р. (49) – тогаш во својство на градоначалник на општина Прилеп, И. Ч. (70) – раководител на Одделението за урбанизам во Општина Прилеп, И. К. (65) – раководител на Секторот за урбанизам во Општина Прилеп, В. Ј. (63) – државен правобранител во Прилеп, Т. М. (63) – нотар, поради постоење основано сомнение за сторено кривично дело злоупотреба на службената положба и овластувањето, М. З. (54) – претседател на Комисијата при Општина Прилеп, Ж. С. (70) – раководител на Одделението за катастар и недвижности, поради постоење основано сомнение за сторени кривични дела злоупотреба на службената положба и овластувањето и давање лажен исказ, Г. Б. (57) – еден од основачите на фирма од Прилеп – купувач на спорните парцели и тужител, како и основач и управител на правно лице од Прилеп, поради постоење основано сомнение за сторени кривични дела злоупотреба на службената положба и овластувањето, фалсификување службена исправа и поднесување лажни докази, Р. П. (56) – вработен во правното лице од Прилеп како изготвувач на геодетските елаборати и за изработка на ДУП поради постоење основано сомнение за сторени кривични дела злоупотреба на службената положба и овластувањето и фалсификување службена исправа, правно лице од Прилеп, поради постоење основано сомнение за сторено кривично дело давање лажен исказ и друго правно лице од Прилеп поради постоење основано сомнение за сторени кривични дела фалсификување или уништување деловни книги и давање лажен исказ.
„Пријавените во својство на одговорни лица со пречекорување на своите овластувања, а со намера да овозможат противправна имотна корист за правното лице од Прилеп, во 2012 и 2013 година, со електронско наддавање, каде ШТО како продавач се јавува општина Прилеп на градежни парцели ГП од КО Прилеп, а како купувач се појавува правно лице од Прилеп, противправно – со лажни имотни листови во кои не постои податок за правото на користење на земјиштето на Министерството за одбрана, кое е запишано уште од 1.10.2009 година, а за што од проверките било констатирано дека сите инволвирани лица знаеле дека се лажни и свесно не ја оспориле нивната валидност во сите постапки постапувајќи најпрвин од онаа при припремата на објавата за продажбата на градежното земјиште, давањето на согласностите од страна на Државното правобранителство – Прилеп, а потоа и во постапката пред суд по поднесената тужба за надомест на штета, а ниту, пак, е поведена постапка пред надлежен суд, на кој начин е отуѓено градежното земјиште сопственост на државата, а врз кое корисник било Министерството за одбрана, со кои дејства по заведен судски спор пред Основниот суд Прилеп од купувачот правно лице од Прилеп против ПМ за надомест на штета, исплатени се парични средства по правосилна пресуда на име уплатен надомест за градежно земјиште, надомест на штета и камати во износ од 19.191.800 денари од буџетот на Република Северна Македонија, а трите парцели биле отуѓени од страна на Општина Прилеп за вкупна цена од 11.442.102 денара по што на ваков начин предизвикана му е штета на буџетот на Република Северна Македонија во износ од 7.749.698 денари, информира МВР.
Во 2013 година, од страна на Општина Прилеп, се вели во соопштението од МВР, му било издадено одобрение за градба на правно лице од Прилеп за изградба на станбена зграда со деловен простор на друга локација во Прилеп, при што бил склучен договор за плаќање на надоместокот за уредување на градежното земјиште на 11 месечни рати и платена е само првата рата, а самиот договор нема предвидено одредби за заштита од неплаќање на долгот ниту, пак, тоа е укинато, на кој начин противправно му е овозможено на истото правно лице од Прилеп да врши градежни работи, без да го плати утврдениот надоместок, што е спротивно на одредбите предвидени во Законот за градењето. Плаќањето на надоместокот за уредување на градежното земјиште е извршено во 2016 година врз основа на судска пресуда по тужбата за продажба на градежни парцели, информираат од МВР.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Даштевски: Во првите два и пол часа пријавени се само технички проблеми, кабел или батерија, ги решаваме во од
Ситни техники проблеми околу биометриските уреди се пријавени во првите два и пол часа од гласањето. Претседателот на Државната изборна комисија Александар Даштевски извести дека гласањето се одвива мирно и без неправилности, а техничките проблеми вели дека тековно ги решаваат.
„Пријавени се само технички проблеми, батерија или кабел на биометриските уреди кои ги решаваме во од. Сите гласачки места се отворени и засега нема прекин никаде“, рече претседателот Даштевски.
Одѕивот во првите два и пол часа е 3,85 отсто, но пристигнале податоци од само 832 избирачки места. На овие избори право на глас имаат 1. 814.317 граѓани на 3480 избирачки места.
Македонија
3,85 отсто е одѕивот за гласање во првите два и пол часа, 12 приговори пристигнале во ДИК
Одѕивот на граѓаните во првите два и пол часа од гласањето за избор на претседател на државата на седмите претседателски избори е 3,85 отсто. Гласањето е почнато навреме, се одвива мирно и без пријавени неправилности. Претседателот на Државната изборна комисија (ДИК) Александар Даштевски утрово рече дека одѕивот е мал, но мал е и бројот на избирачки места од кои се пристигнати податоци.
„До девет часот пристигнати се податоци за одѕив на гласачите од 832 избирачки места. Од вкупно запишани 42.748 гласачи на овие избирачки места, гласале 15.487 или 3,8 отсто од гласачите. До овој момент во ДИК се доставени вкупно 12 приговори за заштита на личното избирачко право кои се предмет на обработка“, рече Даштевски.
На бесплатниот телефонски број 0800 555 44 граѓаните можат да постават прашање или да пријават неправилности до Државната изборна комисија.
Активна е и видеокол линијата 076 488 360 преку која граѓаните со оштетен слух и говор ќе можат преку видео повик да постават прашање до Државната изборна комисија и да добијат одговор на знаковен јазик. На сите граѓани на располагање им се интернет страницата на ДИК www.sec.mk како и страниците на социјалните мрежи „Фејсбук“ и „Твитер“ и каналот на јутјуб.
На страната rezultati.sec.mk може да се следи во живо излезноста на гласачите, вкупна и по општини.
На овие избори право на глас имаат 1. 814.317 граѓани на 3480 избирачки места. Податоци од повеќе избирачки места претседателот Даштевски најави за следната прес – конференција.
Свет
Наставниците во Тенеси ќе можат да носат пиштоли на училиште
Пратениците во американската сојузна држава Тенеси усвоија закон со кој на наставниците во државата ќе им се овозможи да носат скриени пиштоли на училиште. Нацрт-законот беше одобрен со 68-28 гласови во Претставничкиот дом на Тенеси, во кој доминираат републиканците. Државниот Сенат го усвои законот претходно овој месец.
Тенеси има жестока дебата за законите за оружје по минатогодишното пукање во училиште во Нешвил во кое загинаа три деца и тројца возрасни членови на персоналот. Некои од демократите во Претставничкиот дом помогнаа во водењето на протестите во главниот град, што доведе до нивно кратко протерување од законодавниот дом минатата година.
„Ова е ужасен ден за Тенеси, нашите деца, нашите наставници и нашите заедници“, напиша на социјалните мрежи Џастин Пирсон, демократ кој беше исфрлен од Домот минатата година, а потоа беше реизбран. „Наместо да ги заштитат децата, тие пак ги заштитија пиштолите!“
Републиканците и другите конзервативци честопати повикуваат на вооружување на наставниците како одговор на бројните престрелки во училиштата што се случија во САД во последните 25 години. Поддржувачите на овие мерки тврдат дека вооружените наставници ќе ги одвратат потенцијалните пукања во училиштата.
Противниците велат дека оружјето во училиштата веројатно ќе доведе само до трагични случајни престрелки.
Околу половина од сите американски држави им дозволуваат на наставниците или другите вработени во училиштата да носат огнено оружје на училишни терени, според Правниот центар Гифордс, група за безбедност на оружје. Според законот на Тенеси, секое лице кое сака да носи скриен пиштол на училиште мора да заврши најмалку 40 часа полициска обука. Трошоците за обуката заедно со огненото оружје се на товар на поединецот.
Според предлог-законот, идентитетот на наставникот или член на персоналот кој носи оружје нема да биде јавен. Директорите на училиштата мора да дадат одобрение за лице да носи оружје, а началниците на локалната полиција мора да бидат информирани за идентитетот на носителот.