Амбасадорката на САД во ОБСЕ бара одговорност за нападот на Парламентот

Амбасадорката на САД во ОБСЕ, Кејт Бирнс, ги осуди насилничките напади врз пратениците по изборот на Талат Џафери за претседател на Парламентот, најавувајќи дека Вашингтон ќе работи со него за да и даде поддршка на демократијата и за да и помогне на Македонија да се придвижи напред на европски пат.

„Во демократскиот процес нема место за насилство. Изразуваме најдлабоко сочувство до членовите на Парламентот и до сите оние што беа повредени во нападот, како и до нивните семејства. САД ги повикуваат властите на Република Македонија да преземат чекори за да се осигура безбедноста на сите членови на Парламентот, за да се испитаат темелно нападите и за да се повикаат на одговорност извршителите кои, организирано или по наредба, ги извршиле овие акти на насилство“, изјави амбасадорката во Виена.

Таа ги поздрави напорите на австриското претседателство за решавање на ситуацијата во Македонија, најавувајќи посета неделава на висок преставник на ОБСЕ на земјата.

„Како стратешки партнер и пријател на Македонија, со целосно почитување на суверенитетот и единство, САД ги повикуваат сите страни да ги стават интересите на Македонија и нејзините граѓани над сè друго, да работат конструктивно и целосно да ги спроведат сите обврски според договорот од Пржино. Ги повикуваме сите страни да ги решат разликите на мирен начин и да ги почитуваат законите и демократските процеси во Македонија“, изјави амбасадорката.

Според неа, решавањето на политичката криза може да дојде само преку почитување на законите и на волјата на македонскиот народ, слободно изразена преку демократски процеси, вклучувајќи ги и резултатите од изборите во декември лани.крај/мф

Chat Conversation End. крај/мф/кс