(ВИДЕО) Пратениците на ВМРО-ДПМНЕ ја блокираа говорницата, Џафери повика обезбедување

Бидејќи собранискиот спикер Талат Џафери не му даде збор на пратеникот Антонио Милошоски, сите пратеници на ВМРО-ДПМНЕ излегоа на говорницата и ја блокираа поради што беше повикано обезбедувањето.

Пратениците денеска требаше да расправаат за разрешувањето на јавниот обвинител Марко Зврлевски откако пропаднаа претходните неколку обиди за тоа.

Џафери ја разреши ситуацијата со пауза од десетина минути.

Блокадата се случи кога претходно пратеникот Илија Димовски побара расправата за Зврлевски да се стави во мирување повикувајќи се на примената на член 8-а, став 1, алинеја 4 од Изборниот законик за кој тие вчера побараа мислење од Државната комисија за спречување корупција.

Собраниската седница на која се расправа за разрешувањето на јавниот обвинител почната на 5 јули сè уште е во тек. Според пратениците на ВМРО-ДПМНЕ, тоа е во спротивност со Изборниот законик, според кој од денот на донесувањето на одлуката за распишување избори за градоначалник  или членови на советот, односно до конституирање на советот на општините и градот Скопје, не може да се почне со постапка за вработување нови лица или постапки за престанок на работен однос во државни и јавни институиции, а воедно започнатите постапки се ставаат во мирување, освен во случај на итни и неодложни работи.