Живко Митревски побара оставка од министерката Мила Царовска

Живко Митревски ја обвини министерката за труд и социјална политика, Мила Царовска, за обид за незаконска смена на раководството на Сојузот на синдикатите на Македонија. Тој побара оставка од Царовска и соопшти дека против неа е поднесена кривична пријава за злоупотреба на службената положба и овластувањето.

„Новиот обид за промена на раководството на ССМ од страна на министерката за труд, Мила Царовска, и од страна на партијата што ја застапува е резултат на константниот притисок и уцени врз раководството на ССМ да биде пасивизирано и да не се бори за работничките права, а посебно да се пасивизира борбата за барање повисоки плати и во јавниот сектор, плати за администрацијата, војската, полицијата, правосудството и другата администрација, борбата за репрезентативен социјален дијалог и слични притисоци што не им успеваат“, рече Митревски.

Тој рече дека и претходната министерка, Фросина Ременски,  со фалсификувани документи на ист начин направила обид за насилна смена.

„Сојузот на синдикатите на Македонија сака да го информира членството да биде спокојно бидејќи ваквата насилна промена не може да се случи затоа што постои наредба од ОЈО да се спречат сите обиди за промена на претседателот на ССМ и неговото раководството, постојат два заклучока на Централен регистар, со кои се прекинува секаква постапка за менување на претседателот на ССМ, а исто така постои решение на Управниот суд со кое предлогот за промена на друго лице во ССМ се одбива. Со сите овие дејства што ги презема, министерката за труд, Мила Царовска, не само што прави директно кршење на законот и на меѓународните конвенции туку им се спротивставува и на судските одлуки и на судската власт и сака дури да врши влијание врз судовите, институциите и Централниот регистар“, рече Митревски.