Иран: Пукотници во парламентот и напад врз мавзолејот на ајатолахот Хомеини

Вооружена престрелка, во која се повредени неколку лица, се случила во парламентот на Иран, пренесе РТ.

Истиот извор наведе дека најмалку три лица се повредени во инцидентот, додека Спутник, повикувајќи се на новинската агенција Тасним, објави дека во престрелката, во која учествувале тројца напаѓачи, биле повредени најмалку две лица.

„Тројца напаѓачи во парламентот на Иран, засега се повредени две лица. Престрелката трае“, објави новинската агенција Тасним на својот налог на Твитер.

Агенцијата, исто така, објави дека во тек е заложничка криза и дека еден од напаѓачите е уапсен, но овие информации официјално не се потврдени.

Од друга страна, агенцијата ФАРС пишува дека еден од напаѓачите почнал да пука кон обезбедувањето. Агенцијата тврди дека се повредени двајца цивили и еден чувар на Исламската револуционерна гарда, додека еден азилант бил уапсен во ходникот на парламентот додека се обидувал да побегне.

Набргу по инцидентот во парламентот се случил уште еден во мавзолејот на имамот Хомеини, а според агенцијата Тасним, во овој инцидент има и жртви. Засега е непознато дали двата инцидента се поврзани.

Иранската државна телевизија на својата интернет страница објави дека четворица терористи, вклучувајќи и бомбаш самоубиец, го нападнале мавзолејот на некогашниот лидер, ајатолахот Хомеини. Според овој извор, чуварите застрелале еден од напаѓачите, а за време на нападот била уапсена и една жена. Потоа еден од напаѓачите се разнел активирајќи експлозивна направа. крај/мф/нц