И по три трагедии Србија не ги повлекува дипломатите од Либија

За статусот на амбасадата во Либија ќе разговара државниот врв, но сепак, иако сите дипломати се повлечени од таа територија, српското дипломатско преставништво нема да се затвори.

Српскиот амбасадор во Либија Оливер Потежица почина пред два дена од повредите што ги здоби во сообраќајна несреќа.

Според “Блиц”, несреќата се случила поради обид за киднапирање на амбасадорот, кој се движел од правец на Тунис кон Либија, околу два часа по полноќ. Обидот за киднапирање и потоа несреќата што следеше на тоа се случиле на истиот начин и со користење на истиот модел како што беше случај пред две години, кога беа киднапирани двајца службеници во амбасадата, Слаѓана Станковиќ и Јовица Степиќ.

Министерот за надворешни работи, Ивица Дачиќ, изјави за “Блиц” дека се уште не се знае кој ќе биде новиот српски амбасадор во Либија и таа одлука ќе биде донесена во иднина.

„Српската амбасада во Либија треба да остане за нашите граѓани кои живеат таму. Во Либија има повеќе од 500 наши граѓани и нема да ја напуштиме земјата. Имаме намалување на бројот на вработените таму. Ние ќе разгледаме можно преместување на амбасадата, а можеби и затворање“, тврди министерот.

Дачиќ додаде дека Србија нема да испрати нов амбасадор во Либија, туку само заменик-амбасадор и уште еден член на персоналот. Сите западни дипломатии го повлекоа својот персонал од 2011 година. Крај/мф