ЛШ: Во плејофот можен е дуел Марибор – Риека

Познати се сите 20 екипи што ќе играат плејоф за пласман во главната фаза во Лигата на шампионите. Македонскиот првак Вардар не ја искористи шансата, го загуби двомечот со Копенхаген и в петок ќе го чека својот противник во плејофот на Лига Европа.

Како и минатите години, и оваа екипите што се во плејофот се поделени во две групи, лигашка и шампионска.

Во првата група се наоѓаат тимовите што не се шампиони на своите држави, но доаѓаат од најсилните национални шампионати, а во втората група се шампионите на своите држави.

Во првата група се Севилја, Наполи, Ливерпул, Спортинг Лисабон и ЦСКА Москва. Овие екипи го имаат статусот носители. На наведените тимови противници може да им бидат Стеауа, Јанг Бојс, Ница, Башахшекир и Хофенхајм.

Кога станува збор за втората група, тука има поместувања кога се во прашање носителите бидејќи третото коло не ги минаа Легија Варшава, Лудогорец и Салцбург. Елиминацијата на овие три тима во повластена позиција го донесе Марибор, кој на жрепката ќе има статус носител.

Покрај Марибор, носители ќе бидат уште Олимпијакос, АПОЕЛ, Селтик и Копенхаген, а нивни потенцијални ривали се Карабаг, Астана, Риека, Хапоел Бер Шива и Славија Прага.

Извлекувањето на двојките за четвртото претколо во Лигата на шампионите ќе биде извршено в петок во седиштето на УЕФА во Нион. н.ц.