Daily news
Мај – месец на судења – Ќе ги судат ли нови судии предметите на СЈО?
Mај ќе биде мeсец на судења. Рочиштата за единствените две обвиненија кои СЈО ги застапува пред Кривичниот суд „Насилство“ и „Тврдина 2“ се закажани на трети и петти мај. Од Кривичниот суд за Макфакс потврдија дека сè уште не се произнеле дали ќе го прифатат обвинителниот акт за случајот „Транспортер“, кој СЈО го поднесе пред велигденските празници.
На претходното рочиште во случајот „Насилство“ кое се одржа на 10 март, во судницата не се појави ниеден од обвинетите: Груевски, Jaнакиески, Рангелова и останатите единаесетмина. Објаснувањето на адвокатот на дел од обвинетите, Никола Додевски, беше дека неговите клиенти не се појавиле бидејќи има решение со кое Советот на јавни обвинители бара промена на обвинителот во случајот, односно на обвинителката на СЈО, Фатиме Фетаи. На трети мај како сведоци се поканети и градоначалникот на општина центар Андреј Жерновски, претседавачот на Советот на општина Центар, Мирослав Шиповиќ, директорот на Паркинзи Центар, Саша Богдановиќ, како и други 19 сведоци. Според обвинението, првообвинетиот Груевски со умисла побарал, а Јанакиески прифатил преку партиски членови да извршат грубо насилство врз градоначалникот на општина Центар Андреј Жерновски и врз членови на Советот на општината.
Во случајот „Тврдина 2“, минатото рочиште беше одложено бидејќи судијката Лидија Петровска, прозвана во Извештајот на Стејт Департментот, беше на боледување. Обвинителката на СЈО, Ленче Ристоска, тогаш изјави дека успеале да добијат решенија за декласификација на најголем дел од доказите, како што претходно побара судијката Петровска. Во случајот обвинети се седум лица, меѓу кои и поранешниот директор на Петтата Управа Горан Грујевски за незаконско уништување на документи поврзани со опремата за прислушување.
На 4 мај е закажано рочиштето за случајот „Поткуп“, во кој е обвинет лидерот на СДСМ, Зоран Заев. Одбраната по минатото рочиште се пожали дека ги нема добиено доказите од обвинителството.
На 18 мај е закажно рочиште за укинатите делови од пресудата за случајот „Шпион“, кое го застапува СЈО. На минатото рочиште не беше спроведен Марјан Ефремов од затворот „Идризово“.
На 23 мај е закажано ново рочиште во случајот за „Маѓар Телеком“. Последното рочиште за овој предмет е од 20 април, а било одложено бидејќи не бил присутен јавниот обвинител, кој го известил судот дека е спречен да присуствува на рочиштето. Во меѓувреме Американската комисија за хартии од вредност, објави дека тројцата директори на Маѓар Телеком се спогодиле и признале вина. Ова е нов момент во постапката, кој останува да се види на кој начин и дали ќе влијае во судскиот процес кој се води во Македонија.
Два дена подоцна на 25 мај е закажано и судењето во граѓанскиот суд за екс-разузнавачот Слободан Богоевски, по тужбата од Али Ахмети и Муса Џафери за клевета за поврзана со случајот „Маѓар Телеком“. На минатото рочиште, адвокатите на Богоевски побараа судот да се прогласи за ненадлежен за одлучување.
На 18, 22 или 30 мај, од Врховниот суд потврдија дека ќе се одржи јавна седница за случајот „Монструм“, на која ќе се разгледуваат доживотните казни затвор за осудените за петкратното убиство кај Смилковското езеро зависно од обезбедувањето на техничките и безбедносни услови за одржувањето на седницата.
Со новиот распоред во Кривичниот суд кој е веќе во сила, судијките Татјана Михајлова и Лидија Тупанчевска Петровска не се распределени во одделите што можат да ги судат досегашните предмети на СЈО. Се поставува прашањето дали може со новиот распоред на судии, судењата за предметите на СЈО да добијат нов тек и постапките да почнат од почеток? Праксата досега покажала дека сепак при промена на одделите, се случувало судии да изберат по неколку предмети кои ги судат и натаму, иако се распоредени во други оддели. Инаку за овие две судијки, СЈО поднесе и претставки за нивното нестручно постапување до Советот за утврдување факти, токму за предметите кои ги застапува пред Кривичниот суд.
Васко Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.