Министерот за образование го посети студентскиот дом „Пелагонија“

Министерот за образование и наука, Пиштар Лутфиу, денеска го посети студентскиот дом „Пелагонија“ во Скопје, каде во изминатиот период беа реализирани неколку капитални инвестиции како дел од владиниот план за унапредување на условите за сместување и престој на студенти во овој, но и во сите други студентски домови под надлежност на државата.

Имено, во сите соби во студентскиот дом „Пелагонија“ поставени се нови кревети, душеци, маси, столови, бироа и плакари, во вредност од 20 милиони денари, а во рамки на вкупната инвестиција од 100 милиони денари кои МОН ги обезбеди за набавка на целосно нов мебел во сите државни студентски домови.

Во меѓувреме, инвестирани се седум милиони денари за реконструкција на бањите, а поставена е и нова внатрешна столарија.

Исто така, за потребите на домот „Пелагонија“ набавени се и машини за перење и сушење, кои веќе се инсталирани и студентите интензивно ги користат. За потсетување, нови машини за перење и сушење алишта во изминатиот период набавени се и во сите други домови, за што Министерството за образование и наука одвои над 11 милиони денари.

За време на посетата, министерот Лутфиу оствари средба со директорот, Бујар Муртезани, кој го информираше за тековното работење на домот, но и за задоволството на студентите од значително подобрените услови во објектот.

Лутфиу истакна дека активностите за подигнување на студентскиот стандард, особено во делот на сместувањето и престојот на студентите во домовите, ќе продолжат и во периодот што следи. /крај/со/ст