Министерство за култура: Вељановски незаконски издавал дел од објектот на Драмскиот театар

Министерството за култура денеска донесе решение за разрешување на Роберт Вељановски од функцијата директор на Националната установа Драмски театар – Скопје.

За вршител на должноста директор на театарот го назначи актерот Сашо Тасевски, член на ансамблот на Драмски театар.

По бурните реакции во јавноста, Министерството за култура ги образложи и причините за разрешување на Вељановски од директорката функција.

Од Министерството велат дека во изминатиот четиригодишен период Вељановски нема спроведено постапка за реаудиција.

Исто така, инспекцијата констатирала и дека незаконски бил издаван под закуп дел од објектот на Националната установа, простор што е во сопственост на Република Македонија, со оглед  дека претходниот договор за закуп бил истечен на 14.2.2015 година.

Исто така, наведува Министерството, не се водела соодветна евиденција за работното време на вработените, предвидена со Законот за работните односи, а досегашниот директор Вељановски донел и годишна програма за работа на установата без согласност на Управниот одбор.

„Министерството за култура потсетува дека именувањето в.д. директори се прави со цел што побрзо ослободување на клучните институции, кои досега беа заробени од партиски кадри“, се вели во соопштението.

Од Министерството информираат дека најбргу што може ќе биде предложена измена на Законот за државните службеници со цел да се деблокираат институциите и да се обезбеди демократски трансфер на власта во сите ресори.

„Појаснуваме дека по исполнување на законските услови, низ целосно отворен и транспарентен процес, Министерството за култура ќе распише конкурси и ќе спроведе постапки за избор и именување нови директори на националните установи“, се вели во соопштението од Министерството за култура.