ММДЧП се сретна со канадскиот амбасадор Пинингтон, побараа поддршка од Канада

„Претседателот на Македонското меѓународно движење за човекови права (ММДЧП), Бил Николов, на 18 мај се сретна со канадскиот амбасадор во Македонија, Филип Пинингтон и ги повтори ставовите на ММДЧП дека Западот го поткопува суверенитетот на Македонија со давање поддршка на коалицијата на којашто јавна цел ѝ е да ја денационализира Македонија и којашто го злоупотребува срамното мешање од страна на САД и Албанија“, се вели во соопштението на организацијата.

„Игнорирањето на неуставноста и незаконитоста на овој процес ќе има штетни последици врз кредибилитетот на Канада на меѓународно ниво. Канада отсекогаш била бранител на човековите права и демократијата, и за разлика од САД, избегнувала мешање во внатрешните работи на друга земја. Во обид да се изнајде причината за проблематичниот анти-македонски став на Канада, можни се само две опции – наивност или соучество. ММДЧП го повтори барањето до канадската влада за транспарентно и неодложно да ја објасни својата позиција“, додаваат од ММДЧП.

„Одлуката на Канада да не се спротивстави на мешањето на САД во Македонија и на седумдецениската политика на САД за интервенционизам не е својствена за одговорна влада. Изборот да се брани и да се дава поддршка на ваквата поитика на сметка на опстојувањето на друга независна држава е не само шокантен туку и навреда за бранителите на човекови права во целиот свет, како и за бројната македонско-канадска заедница (голем процент од нив беа прогонети и избегаа во Канада барајќи слобода) чии претставници сега мораат да ја бранат својата етничка припадност и идентитет во државата која ги прифати. Доколку канадската влада, што е несфатливо, не го разбира алармот од Македонците и од многу други, во однос на бесрамниот анти-македонски став кај некои држави од Западот, е всушност причина за Канада веднаш да ги научи работите, пред да почнат тие да станат неразјаснив проблем“, велат од организацијата.

„ММДЧП ја истакна иронијата на албанските барања за Македонија да стане двојазична држава. Дали Западот би поддржал барање на македонското малцинство во Грција за таа да стане двојазична, или Бугарија да стане подеднакво бугарска и турска држава? Класичен пример за двојни стандарди“, потенцираат од ММДЧП.

„ММДЧП го повтори своето барање за Канада да ја поддржи независноста на Македонија (како што јавно ја поддржува Украина) и неодложно да ја смени својата анти-македонска политика. Ова вклучува и неодложна осуда на анти-македонските преговори за името. И да знаеме дека Канада се залага за правда и за човекови права“, заклучуваат од организацијата./крај/мф