Контакт

Daily news

Од Вардар треба да се извадат галиите, врбите, мостовите и фонтаните за да нема поплави

Објавено пред

Сè што е во коритото на Вардар бескомпромисно треба да треба да се отстрани, смета Мирко Поповски, пензиониран хидроинженер. Сите градби што се во коритото Поповски ги гледа како пречка за водата, која не се знае во кој момент може да надојде. „Макфакс“ истражуваше што се треба да се извади од Вардар.

„Галиите, врбите, мостовите, столбовите за панорамското тркало и сè што е во коритото на реката мора да се исчисти. Коритото мора да се врати во нормална состојба. Секоја градба го стеснува просторот за проток на водата и претставува брана. Јас сум од постарите модели, ја паметам поплавата од 1962 година, а и онаа од 1979 година и по земјотресот, ако е нешто направено како што треба, тоа е регулацијата на Вардар. За тоа се направени многубројни студии, кои покажаа дека не само во коритото на Вардар туку и покрај коритото, во заштитна зона од 50 метри од брегот, не треба да се предвидуваат објекти, но последниве неколку години покажаа целосно непочитување на основите на тие студии“, вели хидроинженерот Поповски.

По земјотресот, била формирана меѓународна Дирекција за интегрален развој на сливот на реката Вардар, во која членувале претставници од Македонија како дел од поранешна Југославија, но и Грци поради вливот во Егејското Море. Освен оваа меѓународна Дирекција, била формирана и Дирекција за регулација на Вардар задолжена за делот во Скопје, т.е. локална.

„Беа направени студии за регулацијата на реката со врвен квалитет. Правени се геомеханички испитувања, кои покажаа дека делот околу реката не е погоден за градби. Градби се изводливи, но се прескапи оти само темелите би чинеле колку половина објект.

Темелите на сегашните градби покрај коритото на Вардар се под нивото на реката и сосема е очекувано да се поплавуваат“, вели Поповски.

Претходната владејачка гарнитура му се јавила на Поповски за дел од градбите од „Скопје 2014“, но неговото мислење било отфрлено.

Градбите во коритото на Вардар немаат хидротехнички елаборати, алармира архитектот Мирослав Грчев, чиј став е дека тие не треба да останат во реката ни ден повеќе

„Ме побараа за врбите и за мостовите. Јас веднаш им кажав дека и без посебна анализа, мојот став е дека во коритото на Вардар не треба да се гради. Ми рекоа, ако ти не попишеш, ќе најдеме некој што сака да потпише и навистина најдоа. За врбите два дена се објаснувавме. Им кажав дека ако ставам потпис на такво нешто, ќе избришам сè што сум работел последниве 40 години. Исто и за мостовите. Кога се прават мостови, се внимава на хидрауличен отвор на мостот, под мостот мора има простор за да помине одредено количество вода. Класичен пример како не треба да се прави е мостот ‘Око’ оти тој го намалува тој хидрауличен отвор“, рече Поповски.

Пред да почне проектот „Скопје 2014“ најголема опасност за време на поплава претставувал пешачкиот мост зад Владата. За време на поплавата од 1979 година Поповски вели дека хидроинженерите, кои постојано ја следеле состојбата, биле подготвени со експлозив да го кренат во воздух мостот за да не се претвори во брана. Ја исекле оградата за да ги пропушта дрвјата што ги носела водата, а кога водата го прелеала мостот, на неколку места поставиле експлозив и биле подготвени да го притиснат копчето доколку порасне водостојот.

Град Скопје, Министерството за култура и Општина Центар во моментот прават анализи за тоа како да се постапи со објектите од проектот „Скопје 2014“, во кои спаѓаат и градбите во коритото на Вардар. Со нив веќе осма година се менува текот на водата.  Анализите треба да покажат дали и без поплава кај некои од нив ќе се користи експлозив за да се расчистат од коритото.

Од минатонеделното излевање на Врадар

Мирослав Грчев, претседател на работното тело формирано во Министерството за култура за ревизија на проектот „Скопје 2014“, вели дека личниот став му е оти сите градби треба да се извадат од коритото. Ставот на телото сè уште не е утврден оти овие градби сè уште не дошле на дневен ред.

„Сè уште не сме одлучувале за градбите во Вардар. Имаме став само за тоа дека треба да се разгледуваат како целина, како објекти во коритото, а не да ги разгледуваме секој одделно оти сите повеќекратно ги прекршуваат законите. Немаат хидротехнички елаборати со кои ќе ја докажат безбедноста и за објектите и за реката. Тие ја дерогираат регулацијата на Вардар и изградени се само врз основа на ливче со одобрение од „Водостопанство“, спротивно на Законот за градбата, но и на Законот за водите. Сè уште не сме ги обработиле од причини што ги немаме сите документи поврзани со нив. Побаравме од Град Скопје да ни ги обезбеди документите што ги има за мостовите од 2013 година наваму за да можеме да ги провериме. Генералниот став е дека она што е изградено спротивно на законот е нарушување на Уставот и на правниот поредок и не треба да постои. Мојот, пак, личен став е дека со секој нов ден тие градби само ја зголемуваат веројатноста за поплавување на градот и ја намалуваат безбедноста на граѓаните“, вели Грчев.

За изградба на сè она што, според експертите, треба да се извади од Вардар, потрошени се најмалку 7,3 милиони евра според официјално објавените податоци за цената на секоја градба одделно.

Град Скопје веќе го стопира панорамското тркало. Од анализите зависи како ќе се постапува понатаму со големите столбови и делот од мостот што се веќе изградени за тркалото. Тоа почна да се гради во 2014 година непосредно откако Агенцијата за електронски комуникации (АЕК) му донира еден милион евра на Јавното сообраќајно претпријатие (ЈСП), кое стана официјален инвеститор на тркалото, кое го најави Владата предводена од Никола Груевски. Изградбата, според склучените договори, требаше да надмине 18 милиони евра, што го вброи тркалото меѓу најскапите од проектот „Скопје 2014“. Колку пари досега се потрошени за него јавно никој не кажа, со исклучок на донацијата од еден милион евра од АЕК.

Во Вардар, од двете страни на Камениот мост, Град Скопје постави фонтани. Уште кога почна нивната изградба во 2010 година, експертите предупредија дека се промашена инвестиција, а во тоа се уверија и оние што се залагаа за нив, но дури во моментот кога беа пуштени во употреба. Место водоскоци покрај мостот, фонтаните фрлаа млазови кал, во нив се заглавуваше и целото ѓубре што го носеше реката. Минатата година во фонтаните заглави и мртва крава, која од водата ја извади Противпожарната бригада на Скопје. Поради таквото искуство, скопјани ретко кога ги гледаа вклучени. За двете фонтани Град Скопје потроши 831.488 евра и од двете страни на Камениот мост во реката изгради посебни простории со инсталации.

Во коритото на реката се и врбите за кои се потрошени 317.435 евра. Експертите велат дека и ним не им е местото во Вардар. На забелешките дека на многу места во светот во реките има слични поставки, експертите велат дека таквите примери се на реки што се многу поголеми од Вардар и во нив поставувањето скулптура е како фрлање камче песок во водата, а кај нас со инсталациите за врбите одземен е значаен дел од коритото.

И архитектите, и урбанистите и градежните инженери сметаат дека двата нови моста треба да се отстранат

За пешачките мостови – мостот „Око“, преименуван во „Мост на цивилизациите“, и за „Мостот на уметноста“, се потрошени повеќе од 4 милиони евра. Дополнително, за скулптурите на „Мостот на уметноста“ се потрошени 538.521 евро и 648.740 евра за скулптурите на „Мостот на цивилизациите“. И архитектите, и урбанистите и градежните инженери сметаат дека двата моста треба да се отстранат.

На листата за можно отстранување од Вардар се и трите галии. За да ја овозможи нивната изградба, Град Скопје ги изгради постаментите и овозможи приклучоци за струја и вода. Изградбата ја финансираа сопствениците што ги добија локациите на десетгодишно користење. Имаат обврска на Градот да му плаќаат закуп од по речиси 1.000 евра месечно во рок од десет години на колку што им се дадени локациите. Кога новиот скопски градоначалник Петре Шилегов најави дислокација на галиите, сопствениците најавија дека ќе се жалат и ќе бараат отшетта. Градоначалникот ги смири со ветување дека за дислокацијата ќе одлучуваат заеднички и нема да преземат мерки без сопствениците на галиите.

Пред две години во герилска акција околу галијата „Ројал Македонија“  беа поставени ајкули од стиропор во знак на револт од проектот „Скопје 2014“

Две од трите галии ги изгради фирмата „Фаланга дим“, сопственост на Давор Андревски, сопственик на фризерското студио „Диор“, но годинава како нивни сопственици се јавуваат други фирми. Третата галија, онаа спроти барокната зграда на Архивот, ја изгради Столе Филиповски, сопственик на ресторанот „Воденица“.

Останаа неизградени уште три галии во Вардар, а во урбанистичкиот план се предвидени и уште две скулптури во реката, по една од двете страни на мостот за панорамското тркало.

Бурни реакции во јавноста предизвикаа галиите уште во моментот кога беа најавени, а подоцна кога веќе беа изградени, скопјани на разни начини покажуваа дека не се согласуваат тие да стојат во реката. Пред две години, летото 2015 година, во герилска акција околу галијата „Ројал Македонија“, која е спроти новиот театар, во водата беа поставени ајкули од стиропор. Ги извади командантот на Противпожарната бригада на Скопје. Неколку дена подоцна, исто така во герила-акција, покрај галијата беше поставена голема табла со наводен возен ред на галиите, во кој беше наведено дека пловат до Солун, до Пустец и до Подградец и дека со нив стопанисува претпријатието„Јавна пловидба Скопје“ како подружница на Јавното сообраќајно претпријатие. И таблата со возен ред, откако беше раширена на социјалните мрежи, беше отстранета по налог на градските власти, но пораката дека галиите не се пожелни веќе беше испратена до јавноста.

Маја Илиевска-Пачемска



©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news

Прва правна конференција Tres Partes

Објавено пред

На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.

Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.

Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.

Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.

Предвиден е и интерактивен дел со публиката преку поставување прашања и коментари од учесниците.

 

Прикажи повеќе...

Daily news

Груевски оди во затвор – Апелација му ја потврди казната

Објавено пред

Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.

Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.

За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.

Прикажи повеќе...

Daily news

Бизнисменот Минчо Јорданов треба да сведочи дали бил уценет со пари во шпионската афера

Објавено пред

Spion

Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.

Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.

„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.

Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.

Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.

Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.

Прикажи повеќе...

Најново

Македонија41 минута

ВМРО-ДПМНЕ на конвенција во Струга избира партиски кандидат за претседател

ВМРО-ДПМНЕ денеска на Конвенција под слоганот „За честита Македонија“ во Струга го избира партискиот кандидат за претседател на претстојните претседателски...

Македонија11 час

На „Дурмо турс“ не му е првпат да излета од пат, лани го извлекувале на Косово

На „Дурмо турс“ не му е првпат да излета од патот. Косовските медиуми лани известиле за автобус  на оваа компанија...

Македонија12 часа

Само претседателот Иванов не го промени името на државата на веб-страницата

Сите министерства и државни институции на своите веб-страници го сменија името на државата во Република Северна Македонија, освен претседателот Ѓорге...

Македонија12 часа

МВР: Не е спорно ако сопственикот на „Дурмо турс“ вршел технички преглед преку друга своја фирма

За Министерството за внатрешни работи законски нема ништо спорно во тоа што сопственикот на „Дурмо турс“, Дурмиш Белули, во исто...

Македонија13 часа

„Специјал“ им подели крофни со рок до утре на учениците во „Димитар Миладинов“  

Принцес-крофни со рок на траење до утре им биле поделени денеска како ужинка  на учениците во ООУ „Димитар Миладинов“ во...

Македонија15 часа

МВР: Преземени мерки за спречување терористички напад на ИСИС

Министерството за внатрешни работи соопшти дека презело мерки за спречување терористички напад во земјата. „По претходно разменети оперативни сознанија со...

Свет16 часа

Трамп прогласи вонредна состојба

Претседателот на САД, Доналд Трамп, прогласи вонредна состојба на национално ниво, истакнувајќи дека треба да се искористат вонредните овластувања за...

Македонија17 часа

САД почнуваат да го користат новото име Република Северна Македонија

Од Амбасадата на САД во Скопје попладнево информираа дека владата на Соединетите Американски Држави добила официјално известување за промената на името....

Македонија17 часа

(Видео) Манчев: Автопатот Скопје – Тетово не е црна точка

Ристо Манчев од Републичкиот совет за безбедност во сообраќајот за „Макфакс“ изјави дека автопатот Скопје – Тетово не се смета...

Македонија19 часа

„Дурмо турс“ сам на себе си вршел технички преглед – двете фирми со ист сопственик

Исправноста на автобусите на туристичката агенција „Дурмо турс“ се проверувала во фирмата „АМЗ Гостивар“, која има ист сопственик. МВР за...

Македонија20 часа

И во МВР ќе се седи на фотелји од телешка кожа

Министерството за внатрешни работи во четири одделни јавни набавки нарачува мебел за над 150 илјади евра. Бироа, фиокари, ормани, клуб-маси,...

Македонија21 час

(Видео) Лекарски конзилиум одлучува дали да ѝ се ампутира ногата на 20-годишната пациентка

Конзилиум одлучува дали да ѝ се ампутира ногата на 20-годишната пациентка, информира денеска министерот за здравство, Венко Филипче. Тој на...

Топ22 часа

(Видео) Мира Стојчевска – прв предмет на новата антикорупциска комисија

Антикорупциската комисија ќе ги проверува вработувањата на роднините на пратениците и другите функционери за кои изминатиов период имаше обвинувања за...

Македонија23 часа

Двајца патници од автобусот синоќа оперирани, тројца на скопските клиники сè уште се борат за живот

Тројца пациенти примени на скопските клиники сè уште се во критична состојба, рече Илир Хасани, директорот на Клиниката за трауматологија, ортопедски...

Македонија1 ден

Бесплатна психолошка помош за настраданите, за нивните семејства и за спасувачите

Настраданите во трагичната несреќа на автобусот од Гостивар, нивните семејства и учесниците во спасувањето ќе добијат можност за бесплатна психолошка...

Македонија1 ден

Втор ден на жалост по автобуската несреќа

Во земјата денеска е втор ден на жалост по автобуската несреќа што се случи пред два дена на патот Скопје-Тетово,...

Свет1 ден

Британски „Скај њуз“ идентификува трет осомничен во случајот „Скрипал“

Британскиот телевизиски канал „Скај њуз“ идентификува трет осомничен за минатогодишното труење на поранешниот руски шпион Сергеј Скрипал и неговата ќерка...

Свет1 ден

Кремљ ги нарече рекетирање американските санкции против руските енергетски проекти

Напорите на американските законодавци за воведување санкции за руските енергетски проекти и банките се граничат со рекетирање, изјави портпаролот на...

Свет1 ден

Американскиот конгрес одобри средства за градење на оградата со Мексико

Претставничкиот дом на САД во четвртокот со 300 гласа „за“ и 128 гласа „против“ го одобри федералниот Закон за финансирање...

Македонија2 дена

Тројца од повредените во автобуската несреќа се во животна опасност

Во критична состојба се наоѓаат тројца од осумте хоспитализирани на скопските хируршки клиники, кои настрадаа во автобуската несреќа, што се...

Досие