СДСМ ја осуди изјавата на градоначалникот на Дебар

СДСМ во недела ја осуди изјавата на градоначалникот на Дебар Ружди Лата, кој во интервју за телевизијата која известува на албански јазик „Арт Канал“ изјавил дека душата на Дебарчани е во Тирана, верувајќи дека нивниот сон ќе се оствари

„Ја осудуваме провокативната реторика во изјавата на градоначалникот на општина Дебар Ружди Лата, која не е во духот на заедништвото, интеграцијата и меѓусебното почитување на граѓаните“, се вели во соопштението.

„Избраните и именуваните функционери мора да бидат свесни за одговорноста што ја имаат пред Уставот, законите и граѓаните на Република Македонија. И Лата, како и сите други носители на државни функции мора да работат единствено во интерес на граѓаните и секоја изјава, секој искажан збор и секое направено дело мора да биде исклучиво во интерес на граѓаните, што не е случај со последната изјава на Лата“, се вели во соопштението од СДСМ.

Според нив, ваквите јавни настапи одат во прилог само на оние кои креираат поделби и работат на поттикнување раздор и нетрпеливост, спротивно на европските вредности и демократските стандарди за коишто се заложуваме. /крај/со/ст