Синдикатот на Клинички реагира: Не дејствуваме по партиски препораки

Синдикатот не дејствува по партиски препораки, вклучително и препораки на нивни здравствени комисии.
Одлуките и начинот на дејствување на Самостојниот синдикат на Клинички центри ги носат единствено неговите членови, реагираат од Самостојниот синдикат на Клинички центри, во врска со јавниот повик на Комисијата за здравство при ВМРО-ДПМНЕ за сочувување на достоинството на здравствените работници.

„Каде беше оваа комисија во изминатиот период кога претходната власт и тогашниот министер за здравство ги воведуваа проектите ‘плата по придонес’ и електронската контрола на работното време на вработените во јавните здравствени установи преку отпечатоците на нивните прсти. Не слушнавме некој од членовите на оваа комисија како пратеници во Собранието на Република Македонија да гласа против предложениот Закон за изменување и дополнување на Законот за здравствената заштита од 21.11.2015 година со сите понижувачки услови, задолженија и казни содржани во него за докторите и другите вработени во јавните здравствени установи“, реагираат од синдикатот.

Во соопштението од самостојниот синдикат ги прашуваат и комисиите за здравство на СДСМ и нивните коалициони партнери за нивниот став во врска со предложениот буџет за 2018 година и планираното покачување на платите за докторите и медицинските сестри од 5%. Велат дека понатамошните постапки на Самостојниот синдикат на Клинички центри ќе зависат од резултатите на преговорите со ресорното министерство и ќе бидат израз на ставовите на неговите членови.